boxeo izarrak
23:30ean
Lau borrokaldi Castro Urdialesetik, gaur gauean, "Boxeo Izarrak" saioan
EiTB
Besteak beste, Joana Suarezek eta "Buxi" El Quaissik neurtuko dituzte indarrak, Emakumezkoen Espainiako Txapelketako oilar pisuan.
-
Manu Maritxalar eta Pedro Mari Goikoetxea, "Boxeo Izarrak". EiTBren bideo batetik ateratako irudia
Zenbait hilabeteko geldialdiaren ondoren, boxeoa berriro ere martxan da eta uztailaren 24an Castro Urdialesen (Kantabria) egingo den saioa eskainiko du ETBko "Boxeo Izarrak" programak. Guztira, lau borrokaldi ikusi ahal izango dira.
Lehengo, Rikar Urrutiak Fernando Gandariasen aurka egingo duena, eta ondoren, Jon Jaderren eta Edwin Palaciosen artekoa izango da ikusgai.
Jarraian, Emakumezkoen Espainiako Txapelketa lehiatuko da, oilar pisuan, eta Joana Suarezek eta "Buxi" El Quaissik neurtuko dituzte indarrak.
Azkenik, Jon Miguezek eta Zoltan Szabok egingo duten norgehiagoka izango da ikusgai. Miguezek 11 borrokaldi egin ditu orain arte eta denetan garaile izan da. Szabok 27 garaipen eta 23 porrot ditu bere palmaresean.
"Boxeo Izarrak" saioak lau borrokaldiak eskainiko ditu ostiral honetan, 23:30etik aurrera, ETB1en, Pedro Mari Goikoetxearen eta Manu Maritxalarren eskutik.
