Maialen Lujanbioren performer aldea, gaur gauean, 'EiTB Kultura Transit'en

Maialen Lujanbio Euskal Herriko bertsolari txapelduna dela jakina da. Bertsoaz gaindiko sorkuntzan ere aritzen da, ordea, eta berriki eskaini du Tabakaleran, Esther Ferrer artistaren erakusketaren baitan, bere azken performancea. Inguruaren eta bizi dugun une historiko zein politikoaren hitzezko interpretazio poetikoa da ikuskizuna.

Lujanbioren beste alde hori ezagutzera joan da 'EiTB Kultura Transit' Tabakalerara, eta, bide batez, orain arte egin dituen beste ikuskizunez ere hitz egin du. Bertsolaritzaz ere jardun da, eta kontatu digu gaur egun euskal kulturan duen abangoardiako postua ez dela erabateko optimismorako arrazoia.

Iseo & Dodosound

Leire Villanueva iruindarra dago Iseo musikariaren atzean. Aspaldian Madril erdigunetzat hartu eta musikak bultzatuta agertokiz agertoki geratu gabe badabil ere, bere herri kuttunera gonbidatu gaitu, Irunberrira, 2013tik lantzen ari den proiektu musikalaz hitz egiteko.

Dodo DJarekin batera sortutako taldea da Iseo & Dodosound. Bi musikarien influentzien batura oso emankorra izan zen, eta horren adibide dira dagoeneko kalean dituzten bi diskoak: Cat platoon eta Roots in the air.

Kantu berriak prestatzen ari direla esan digute, eta aurki 'mixtape' bat argitaratuko dutela jakinarazi digu bikote nafarrak. Bertan izango den abestietako bat esklusiban entzuteko zortea izan dugu: 'Same love'.

Arantza Santesteban

Iruñeko Hiriartea kultur garaikideko zentroko koordinatzailea da Arantza Santesteban, eta Zitadelako espazioak erakutsi bitartean azalduko dizkigu bere proposamenak: Ibon RGren musika, Gazteako 'Moon Safary' irratsaioa, Marina Garcesen Nueva ilustración radical eta George Didi-Huberman-en Imágenes pese a todo saiakerak, eta Husbands eta Born in flames pelikulak.

'EiTB Kultura Transit' gaur gauean izango da ikusgai ETB1en (23:30), ETB2n (01:00) eta eitb.eus-en.