Mikel Idoate pilotari ohia 'Gure Kasa' saioan izango da gaur gauean

Mikel Idoate, Txantrea auzoko pilotari ohi iruindarra, hartuko dute gaur 'Gure Kasa' saioan. Eskuko lesio batengatik pilota mundua utzi behar izan zuen, baina horrek ez zion ilusioa kendu beste ekimen batzuetan aritzeko. Orain dela bi urte negozio bat abiatu zuen, agian ez da negoziorik ohikoena, ehorztetxea baita. Xabier Euzkitzek 'Bisitaria'n egiten zuen moduan, 'Gure Kasa'k Nahiara Gago bidali du bisitan etxe horretara.

Mikel Idoatek kirol profesionala utzi zuen, baina kirola ez du sekula alde batera utzi. Irati Anda berarekin aritu da tenisean, eta erraketarekin duen abilezia erakutsi dio.

Uda bete-betean gaude, eta urtaro honetan nonahi dira lehiaketa gastronomikoak. Iban Garciak lehiaketa gastronomiko etxekoia antolatu du: amaren aurka lehiatuko da, ea nork prestatzen duen patata-tortillarik onena.

'Gure Kasa' 21:30ean dago ikusgai, astelehenetik ostegunera, eitb.eus-en eta ETB1en.