Hitzetik Hortzera: Bertsoak Euskal Telebistan | EITB Hitzetik Hortzera

Hitzetik hortzera

09:00

Hitzetik hortzera

15:00etan

Juantxo Arakama Glaukomako kantaria, gaur, 'Hitzetik Hortzera' saioan

A.E.|EiTB

Tolosa eta Getariko bertsoaldien errepasoa ere egingo dute.

  • Whatsapp
  • Whatsapp
  • telegram
  • Bidali

Juantxo Arakama tolosarra, Glaukoma musika-taldeko abeslari eta letra askoren egilea izango dute gaur 'Hitzetik Hortzera' saioan. Musikaz, letragintzaz eta Tolosaz ariko dira berarekin hizketan. Izan ere, aste honetan bertso-saio berezi batek beteko baitu programako tarterik zabalena: Tolosan Atariaren alde Leidor antzokian egin zen saioak. Getariako bertsoaldiak ere entzungai izango dira gainera.

Azken urteotan ospe handia lortu du Glaukoma musika-taldeak. Reggaea jotzeko elkartu arren, rap doinuak ere txertatu dituzte beren abestietan. Aste honetako 'Hitzetik Hortzera'n taldeko kantaria eta letragilea izango dute gonbidatu: Juantxo Arakama.

Musika eta hitza, Juantxo Arakamaren ahotan

Tolosarra da Juantxo Arakama, eta azken urteotan bertso-saio askotara joateko aukerarik izan ez arren, gertutik ezagutzen du bertsolaritza. Musikan egin duen ibilbidea ezagutzeaz gain, Tolosari buruz ere jardungo dira berarekin.

Gertuko ahaideak dira bertsoa eta rapa gainera, hitzak pisu handia hartzen baitu bietan. Bien arteko antzekotasunez eta ezberdintasunez ariko dira Juantxo Arakamarekin, eta kantuan entzuteko aukera ere izango dugu.

Atariaren alde Tolosan

Eta Juantxo Arakamaren laguntzaz joango dira aste honetako bertso-saio nagusira. Azken urteotan tradizio handiko saioa bihurtu da urtez urte Tolosan Ataria hedabidearen alde egiten dena. Aurtengoan ere lepo bete da Leidor Antzokia, eta giro beroaren babesean saio ederra osatu zuten Andoni Egañak, Maialen Lujanbiok, Agin Laburuk, Beñat Iguaranek, Amets Arzallusek eta Aitor Mendiluzek.

Umorea nagusi

Amaia Agirre aritu zen gai-jartzaile moduan eta, ohi duen gisan, ederki uztartu zituen umorea eta gaurkotasunezko gaiak. Esate baterako, autoeskola batean gidabaimena atera nahian entzungo ditugu Andoni Egaña, Maialen Lujanbio, Aitor Mendiluze eta Beñat Iguaran; baztertutako jostailuen larrutik ariko dira Maialen Lujanbio, Aitor Mendiluze, Amets Arzallus, Beñat Iguaran eta Agin Laburu, eta aita-semeen paperetik jardungo dira Agin Laburu eta Beñat Iguaran. Beñat Iguaranek berak bertsoaldi umoretsua osatuko du Andoni Egañaren laguntzaz. Beñat Iguaranen aita eta Andoni Egaña Zarauzko Lizardi sarian kantuan aritu ziren 1982an, eta 26 urte igaro ondoren semea desafioka etorriko zaio Andoni Egañari.

Bakarkako bertsoaldi eder bat entzuteko aukera ere izango dugu. Gauean, parrandan, leku deserosoan jarriko du Andoni Egaña Amaia Agirre gai-jartzaileak, eta zazpi puntuko neurrian, ederki borobilduko du umore kutsuko bertsoaldia zarauztarrak entzuleen gozamenerako.

Sindikatuak, geografia eta suteak Getarian

Aste honetan, ordea, Tolosako bertsoaldiez gain bestelako aleekin gozatzeko aukera ere izango dugu. Urtarrilaren 14an saio ederra izan zen Getarian, eta hango hiru bertsoaldi berreskuratuko dituzte 'Hitzetik Hortzerara'ko. Hasteko, Sustrai Colina eta Igor Elortza bertsolarien sindikatu bat sortzeko lanetan jarriko ditu Uxue Alberdik. Ariketa berezia jarriko dio Amets Arzallusi ere, bertsotarako dagoen molderik zailenetako batean jarriko baitu kantuan Euskal Herriko maparen gainean: bederatziko txikian. Geografia eta teknika erakustaldi aparta emango du hendaiarrak. Eta, azkenik, kartzelako lanean entzungo dugu Maialen Lujanbio. Baina ez edozein kartzelako lanetan. Azkeneko urteotako joerari buelta emanaz, gai itxi bat jarriko du Uxue Alberdik. Hendaiarra ederki aterako da atakatik.

Bazkalostean ikusgai

Astero bezala, igande bazkalostean izango da hitzordua, 15:00etan, ETB1en. Eta interneten ere eskueran izango da programa EiTB Nahieranen.

Iruzkinak

  • Publizitatea
    logo eitb nahieran
    Publizitatea
    Floorren arauak Ezarrita dagoenaren aurkako arauak ezartzen Floorren arauak
    Prentsa Aretoa Prentsa oharrak, deialdiak, agenda, fototeka,… Prentsa Aretoa
    Publizitatea
    Publizitatea

    Bisitatuena

      Kargatzen ikusiena
      Kargatzen ikusiena