Cristina infanta: 'Ez dakit ezer, konfiantza osoa nuen senarrarengan'

Cristina infantak Jose Castro epailearen aurrean esan duenez, Iñaki Urdangarinek agintzen zizkion agiri guztiak sinatzen zituen, bererengan konfiantza zuelako, epaitegietako zenbait iturriren arabera. 6 orduz epailearen aurrean deklaratzen egon ostean, 18:11n atera da Palmako epaitegitik.

Autoan sartu aurretik, irribarretsu ondorengoa adierazi die bertan zeuden kazetariei: "Gero arte, eskerrik asko".

Cristina infantaren defentsa taldeko buru den Miguel Roca abokatua pozik mintzatu da kazetarien aurrean: "Pozik gaude infantak bere esku-hartzeari buruzko xehetasunak eta azalpenak emateko aukera izan duelako". Roca abokatuak kazetarien aurrean hitz egin du, eta infanta Cristinak justiziarekin kolaboratu duela eta inolako pribilegiorik ez duela izan nabarmendu du. Horren esanetan, "bere egia kontatu du", eta "errugabea dela" eta "guztiok legearen aurrean berdinak garela" erakutsi du.

Infanta Cristinaren deklarazioaren harira inolako baloraziorik ezin duela egin adierazi du Jose Castro Noos auziko epaileak, eta dagokion izapidea heltzen denean egingo duela gaineratu du. Kazetarien galderei erantzunez ondorengoa esan du: "Ez da balorazioak egiteko unea. Izapideak egiteko momentua heltzen denean egingo ditut balorazioak", nabarmendu du. Hitz horien ondoren, motorra hartu eta epaitegiko aldapatik jaitsi da.

Ustelkeriaren kontrako Fiskaltzalk berretsi duela ez delitu zantzurik ikusten. Infanta Cristinak ez lukeela inputatuta egon behar eta inputatu gisa deklaratzea ez zela beharrezkoa nabarmendu du.

Arratsaldeko saioa 17:00ak aldera hasi da, eta 30 minutuz Pedro Horrach Ustelkeriaren kontrako fiskalaren galderei erantzun die. Geroago, Fiskaltzaren galderei ere erantzun die, ez ordea akusazioari.

Goizeko saioa bukatu denean (15:00ak inguruan) infantak otarteko bat bazkaldu du, Jesus Maria Silva bere abokatuak hedabideei esan dienez, baina Erregearen alaba "indartsua" da eta "eusten dio".

Epaileak 15:00etan eten du goizeko saioa bazkaltzera joateko, eta 17:00etan berrekin diote saioari.

Goizean, Aizoonen faktura guztien inguruan galdetu dio epaileak, galdeketa "oso sakon" batean. Infanta Aizoonen akzioen % 50 jabe da, eta beste erdia, Urdangarinena da.

Infantaren arabera, Erregeak Bartzelonako jauregia erosteko emandako dirua, 1,2 milioi euro, pixkanaka itzultzen ari dio. Bere aita izanda, gaineratu du, erregeak badaki dirua itzuliko diola, eta dagoeneko itzultzen ari diola ziurtatu du.

Epaileak Aizoon enpresako gastuen inguruan galdetu dio galdera gehienetan, iruzurra egiteko erabili izan zuten susmoa baitu.

Infantak onartu egin du enpresaren txartelarekin ordainketak egin izana, baina ziurtatu du ez dela Ogasunari iruzurra egiteko bide bat, eta inoiz ez zuela pentsatu egindako legez kanpo egongo zenik.

Halaber, infantak esan du ez zuela erantzukizunik Aizoon enpresaren kudeaketarekin, eta ez dagoela lotuta enpresa horrek egindako etxeko langileen kontratazioarekin.

Edonola ere, infantak azpimarratu du berak ez dakiela zein den enpresa horren egunerokoa, Iñaki Urdangarinen gidaritzapean omen dagoelako. Epaitegietako iturrien arabera, Cristina infantak itxura lasaia zuen eta irribarretsu agertu da.

Gainera, onartu du bazekiela Juan Carlos erregeak Iñaki Urdangarini Noos Insututuko jarduerak bertan behera uztea gomendatu ziola, 2006ean, Jose Manuel Romero Fontaoko kondearen bitartez.

Ez daki, ez du erantzuten

Bestalde, Manuel Delgado Foro Civico de Julio Anguita herri akusazioko abokatuetako baten arabera, infantak bere senarrarengan enpresak kudeatzean zuen konfiantzan oinarritu du deklarazioa.

Artxibatzea

Jesus Silva infantaren abokatua baikor agertu da Castrok infantaren kontra egindako "akusazioak artxibatuko" dituela.

"Oso pozik gaude itaunketaren goizeko saioa eta gero", esan du abokatuak, epaileak bazkaltzeko eman duen bi orduko atsedenaldian.

Silvaren arabera, halaber, galdeketa "sakona eta luzea" izan da eta Palmako dukeak epaileak egindako galdera guztiei erantzun egin diela ziurtatu du.

"Oso argi geratu da zer zekien, zer ez zekien, jakin behar zuena eta jakin behar ez zuena", gaineratu du Silvak. Gainera, Cristina infanta "nekatuta" zegoela esan du, baina "indartsua da eta eusten dio".

Silvak, gainera, ezeztu du ihes-hitzekin erantzun duenik infantak eta azpimarratu egin du "ehunka" galderei erantzun diela, "dakiena eta ez dakiena argituz", baita suposatu zezakeena ere.

Goizean goiz

Cristina infanta gaur, larunbata, hasi da deklaratzen 09:58ean, Noos auziko ikerketan bere izena lehenengoz agertu eta bi urte baino gehiagora. Aizoon Noos Institutua diru publikoa zuritzeko sareko enpresetako bat zela ondorioztatu zuen Fiskaltzak, garai horretan (2011). Cristina infanta eta Iñaki Urdangarin bere senarra enpresa horren jabeak dira.

Cristina infanta 10:00ak jotzeko minutu batzuk falta zirenean heldu da Palmako Auzitegira. Autoz heldu da ia ateraino, bere senarrak orain dela bi urte ez bezala, ondoko kaletik oinez etorri baitzen. Ikusmin handia zegoen Palmako Justizia Auzitegiaren inguruan, baita ehunka (400 inguru) polizia ere.

Protestak epaitegien inguruan

Ehunka pertsonak Palmako Epaitegiaren inguruan elkarretaratzeak egin dituzte ustelkeria eta Monarkiaren kontra, hala nola, Països Catalansen eta Jose Castro epailearen alde.

Lagun asko Errepublikaren eta independetziaren alde manifestatu dira; beste asko, ordea, Coca-Colako EEEren kontra, petrolioa ateratzeko egitasmoen kontra eta Castro epailearen alde.

Infanta inputatzeko argudioak

Jose Castro instrukzio epaileak infanta inputatzeko erabilitako argudioetako batzuk:

- "Argi dago Cristina Federica Borboikoa eta Greziakoak ez duela inoiz Aizoon enpresaren bidez lortutako dibidendurik deklaratu".

- "Ezin da onartu Aizoon konpainiak dibidenduen banaketa iluna egitea; senar-emazteek [Palmako duke-dukesak] gastu pertsonalak egin ahal izateko egin zuen".

- "Cristina Federica Borboikoa eta Greziakoak Aizoon enpresari kobratu zizkion gastu pertsonalak iruzur bikoitza izan ziren".

- "Diru kopuru horiek gastu pertsonal hutsak ordaintzeko erabili zituzten, eta pertsona fisikoen errentaren gaineko zergan (PFEZ) deklaratu behar zituzten, higiezinen errendimendu gisa, baina argi dago Iñaki Urdangarinek eta Cristina Borboikoak ez zutela inoiz egin. Horrenbestez, behin eta berriro egin zioten iruzur Ogasun Publikoari".