Politika -
2017ko aurrekontuak
Araban onartutako aurrekontuek agerian utzi dute Podemosen haustura
Arabako Aldundiak aurrera atera ditu datorren urterako kontuak, 473 milioi euro dituztela, aurtengo jardueran baino % 8 gehiago.
Agentziak | Erredakzioa
Arabako Batzar Nagusiek 2017rako lurraldeko aurrekontuak onartu dituzte ostiral honetan. EH Bilduren babesa izan du, PPk, Irabazik eta Podemoseko zortzi batzarkidek errefusatu egin dituzte (gainerako hiru prokuradore abstenitu egin dira), baita Miguel Angel Carrera independenteak ere.
Modu honetan, Arabako Aldundiak (EAJk eta PSE-EEk gutxiengoan gobernatzen dute) aurrera atera ditu datorren urterako kontuak, 473 milioi euro dituztela, aurtengo jardueran baino % 8 gehiago.
Gizarte Zerbitzuen Sailak gastuen benetako aurrekontuaren % 48,5a hartuko du, eta, Foru Gobernuaren arabera, instituzioan murrizketarik ez egotea ahalbidetuko du.
Eztabaidan, EAJk eta PSE-EEk aintzat hartu dute koalizio abertzalearekin lortutako akordioa eta Podemosen abstentzioa. Halaber, Irabaziri eta PPri “nerabezaro politiko jarraian” egotea leporatu diete, baita “aurrekonturik ez izatea bilatzea” ere.
Bermeen Batzordeak ikusiko du Podemoseko batzarkideen kasua
Euskadiko Podemosen zuzendaritzak Bermeen Batzordearen esku utziko du Arabako Batzar Nagusietan aurrekontu-proiektua errefusatu duten alderdiko lau kideen kasua. Formazioko gidalerroa abstenitzea zen.
