Celta-Reala: Zalantza bakarrarekin

Helburua eskuratzeko aurrerapauso itzela eman du Realak azken bi hilabeteetan. Rico Perecen bost gol hartu bazituen ere, zutitzeko ahalmen eredugarria erakutsi du sei garaipen eta hiru berdinketa lortuz. Hau da, jokoan ziren azken 27 puntutatik 21 batu ditu eta bide horretatik jarraituz gero buruketa desegitea lortuko du. Joko mailaz haratago, eztabaida iturri amaigabea izango baita amaiera arte, talde fidagarrian bilakatu da, sendotasunak puntuak aitortzen baitizkio eta puntuek konfiantza. Horregatik ontzat jo behar da Vila-Realetik ekarritako puntua zapore mikatza utzi arren, eta Balaidosen ez galtzea beste urrats bat izango litzatekeen. Bigarren maila inurri lana baita, tirriki-tarraka egin behar da aurrera eta sailkapenean batutako puntu kopurua gizendu ahala izarren ligatik geroz eta gertuago daude gipuzkoarrak.

Bi baja garrantzisu izango ditu bihar arratsalderako Martín Lasartek. Giharretako arazoek baztertu dute berriz ere Zurutuza eta Aranburu zigortuta dago. Entrenatzaileak garbi adierazi zuenez, joko-sistema bere horretan mantenduko du, eta punta-erdian duen hutsunea beste norbaitekin estaliko du. Emilio Nsue itzul daiteke, bai ezker hegalera, kasu horretan Griezmannek egingo luke barrura, baita aurrelariaren atzetik jokatuz. Bestalde, Markelek tokia izan lezake Elustondo eta Rivasen inguruan. Zelai erdia indartzeko balio duen aldaketa da, nahiz erasoari ez dion lehenbizikoak bezain beste emango. Azkenik, Sergioren aukera ere aintzat hartu behar da, nahiz jokatzeko aurreko biek baino aukera gutxiago izan. Gauzak hala, hamaikako honen aldeko apustua egin lezake: Bravo, Gonzalez, Ansotegi, Labaka, De la Bella, Elustondo, Rivas, Markel edo Nsue, Griezmann, Prieto eta Agirretxe.

Arratsaldean abiatuko dira Vigorantz hegazkinez eta neurketaren ostean bueltatuko dira. Euskal Telebistako lehen katean egongo da ikusgai Celtaren eta Realaren artekoa.