Espanyol-Athletic (1-0): Esku hutsik

Athletic Clubek porrota jaso du Espanyoli egindako bisitan (1-0). Luis Garcia izan da golegilea partida arraro eta kaskar batean zuri-gorrientzat.

Lehen zatia gorabeheratsua izan da, Athleticentzat batez ere. Gurpegik eta Ustaritzek buruarekin tupust egin dute 3. minutuan eta Abadiñoko atzelariak hesgailu deseroso batekin jokatu behar izan du partida. 10.ean sarrera egin dio Didacek Yesteri eta hasiera batean jarraituko zuela ematen bazuen ere aldaketa eskatu du eta Susaeta sartu da bere ordez. Koikilik eta, berriro, Gurpegik min hartu dute eta medikuekin izan dira. Espanyolen jokoa ez da oldarkorregia izan, baina zortea ez da bilbotarren alde egon.

Jokoa eskasa izan da lehen 45. minutuetan, baina aukera garbienak Pochettinoren gizonentzat izan dira. 18. minutuan gola sartzeko aukera izan du Callejonek, boleaz, Osvaldok bi abagune sortu ditu eta Amorebietak gutxigatik ez du gola bere atean sartu baloi bat aldaratu nahian. Iraizozek lana izan du, baina oraingoan ere bikaina izan da atezaina nafarraren erantzuna. Athleticen aukerarik onena, eta bakarra, Susaetak izan du areatik kanpo egindako errematean.

Bigarren zatiaren hasieran berdegunean etzanda ikusi dugu berriz ere Ustaritz, osatu da, baina 61.ean Muniainek hartu du bere lekua. 59.ean heldu da etxeko taldearen gola: Marquezek jaurti, Iraizozen aldaratzea eta Luis Garciak sartu du gola (1-0). Caparrosek lau minutu geroago egin du azken aldaketa De Marcos sartu eta Toquero aldageletara abiatu denean.

Athleticek susperraldia bilatu du golaren ostean, baina ez da nahiko izan. Espanyolek ondo defendatu du 1-0eko errenta eta azken minutuetan Athletic erasoan egon bada ere esku hutsik bueltatuko dira Bilbora.

Fitxa teknikoa:

1. RCD Espanyol: Cristian Alvarez; Chica, Pareja, Victor Ruiz, Dídac; Baena, Javi Marquez; Luis Garcia, Verdu (Roncaglia, 90''), Callejon (Corominas, 67''); eta Osvaldo (Ivan Alonso, 81'').

0. Athletic Club : Iraizoz; Iraola, Ustaritz (Muniain, 60''), Amorebieta, Koikili; Gurpegui, Iturraspe, Orbaiz, Yeste (Susaeta, 18''); Toquero (De Marcos, 65'') eta Llorente.

Gola:

1-0, 59'': Luis Garcia.