Eduardo Zubiaurre, Confesbaskeko presidentea, 'Faktoria'n

Joan den uztailaz geroztik Confebask enpresarien elkarteko presidente berri dena izango da 'Faktoria' albistegiko gonbidatu nagusia ostegun honetan. Eduardo Zubiaurrek goizeko 09:30etik aurrera erantzungo die Maite Artolak egingo dizkion galderei.

Egunak dakartzan albisteetan sakontzeko zabalduko dute, aurrez, analisi mahaia. Xabier Riezu, Martxelo Otamendi eta Pilar Kalzadarekin batera arituko dira aktualitateak dakartzan gai nagusiei buruz. 

Goizeko zortzietako albistegiaren aurreko zutabea osatzeko ardura Aingeru Epaltzarena izango da.

10:00etan ekingo dio magazinari Manu Etxezortuk. Hasteko, prentsaren entresaka egingo digute Mikel Garcia eta Xabier Landabidea kazetariek. Jarraian, Klimaren Asteari egiten ari gatzaizkion tartean, Jauregia Esnekiak lantegiko Mikel Azkaraterekin hitz egingo dugu. Esne makina jartzen lehenak izan ziren Euskal Herrian.

Zinemaldiari tartea egingo diogu 11:00etan eta, jarraian, Mireia Roca arkitektoarekin, Hondarribiko paradorea izango dugu hizpide. 12:00etan, Ziortza Karrantza psikologoaren kontsulta zabalduko dugu, zineterapiaz aritzeko. Gainera, Mikel Chamizoren konposizioa estrenatuko du EOS-ek, eta harekin hitz egingo dugu. Azkenik, Artzain-Ona katedraleko dorrea berritzeko lanetara bisita egingo dugu.