Memoriaren egunean, Ainara Hernandez, ETAk hil zuen Gregorio Hernandezen alaba, "Faktoria"n

1982ko urriaren 15ean, Leitzako Guardia Zibilaren kuartelaren atarian erail zuen erakunde armatuak Gregorio Hernandez, eta memoria egunaren harira, bere alaba, Ainara Hernandez, elkarrizketatu du Iñaki Guridik. 08:30etik aurrera eskainiko dugu Leitzan grabatutako elkarrizketa.

Horren aurretik, Iruñearekin egingo dugu bat; Eli Erasok Parlamentuan gaur biharretan egingo den politika orokorreko bilkuraren nondik norakoak kontatuko dizkigu. Tertulia garaian, Jon Abril Elhuyar Fundazioko zuzendaria espero dugu. 50 urte dira Elhuyar sortu zela, eta Usurbilgo erredakziora hurbilduko gara erakundeko lankideek urteurrena nola bizi duten bertatik bertara ezagutzeko.

Lekukoa Maider Segurolak hartuko du 10:00etan, magazinari ekiteko. Hasteko, San Martin egunaren atariko, Manu Eizagirre Basatxerriko ekoizpen arduradunarekin hitz egingo dugu. "Bai baina" tartean, Ibis Ugarteren txanda izango da, eta Europako Surf Junior txapeldunak ezagutuko ditugu, Bitor Garitaonaindia eta Janire Gonzalez Etxebarri.

11:00ak aldera, Lekeitioko "Eusfamilia" egitasmoaren berri jasoko dugu. Euskaraz ikasteko egonaldia, beste familia batean. Ibon Goitia Lekeitioko Azkue ikastolako zuzendariak eta Aritz Elorrieta parte hartuko duen familia bateko kideak emango dizkigute azalpenak. Gainera, multikirolaren onurez hitz egingo digu Oidui Usabiagak, eta Nafarroako informazio lokalaren tartean, munduko gaztarik onena dastatuko dugu, Legasako Ardiarana, Alberto Migueltorena gaztategiko nagusiarekin. 

12:00etan, Arrasateko Santa Ageda bainuetxean sartuko gara Pilar Askasibar Arrasate Zientzia Elkarteko kidearekin, eta amonak inspirazio iturri izan dituzten Iñigo Etxezarreta musikariarekin, Amaia Telleria eta Hedoi Etxarte idazleekin eta Itziar Manero aktorearekin.