'Faktoria'k Bilbora joko du, 'Igelak' filmaren estreinaurrekora

Ostiralean, azaroak 25, Igelak filmaren matinée berezia izango dugu EiTBren Bilboko egoitzako Multibox aretoan, Euskadi Irratiaren eskutik. Patxo Telleriak zuzendutako filma abenduaren 2an estreinatuko da zinema-areto komertzialetan, eta, atariko gisa, estreinaurrekoa egingo du, 10:30ean hasita. Emanaldi horren harira, 'Faktoria Magazina' Bilbotik egingo dugu. Gainera, saioaren azken ordua streaming bidez izango dugu ikusgai Euskadi Irratiaren eta 'Faktoria'ren atarietan, eta, tarte horretan, Gatibu taldeak bi abesti joko ditu zuzenean.

'Albiste Faktoria' 07:00etan hasiko da, eguneko albiste nagusien errepasoarekin. 08:00etan, Maite Artolak hartuko du lekukoa, eta Niko Cuenca ekonomistarekin hitz egingo du Black Friday ezagunaz. 08:30ean, solasaldian izango dira Iñaki Galdos analista politikoa, Felipe Juaristi idazle eta kazetaria eta Garbiñe Sanmiguel epailea.

09:00etan, berriz, Indarkeria Matxistaren kontrako Nazioarteko Eguna dela eta, Izaskun Landaida Emakundeko zuzendariarekin hitz egingo dugu. 09:30ean, gainera, alkateen solasaldia izango dugu. Julen Mendoza Errenteriako alkatea, Igotz Lopez Zamudioko alkatea eta Mikel Serrano Zumarragako alkatea ariko dira Indarkeria Matxistaren kontrako Nazioarteko Egunaz eta Elikagai Bankuaren janari bilketaz.

10:00etan, Bilbotik hartuko du lekukoa Manu Etxezortuk. EiTBko egoitzako atarian jarriko dugun set berezian elkarrizketatuko ditugu Patxo Telleria Igelak filmaren zuzendaria, Joxe Portela ekoizlea eta Miren Gaztañaga aktorea. Kirol aurrerapenaren ostean, Mikel Garciak eta Jurdan Arretxek asteko titularren errepasoa egingo dute.

11:00etan, Garirekin ariko gara solasean. Abesti batekin parte hartu du filmean. Gainera, disko berria ere plazaratu du artista legazpiarrak. 11:30ean, Elikagai Bankuen janari bilketa erraldoia izango dugu hizpide, bertako laguntza jasotzen duen Pilar Goikoetxearekin.

12:00etan, filmaren proiekzioa amaitu ondoren, gure setera etorriko dira protagonista batzuk, eta zineforuma egingo dugu. Patxo Telleria izango dugu berriz gurekin, Gorka Otxoa aktorea telefonoz sartuko da, eta Gatibuko kideak ere izango ditugu. Gainera, Gatibuk bi abesti joko ditu akustikoan. Saioa amaitu aurretik, Ane Muñozen zinema gomendioa entzungo dugu: Shutter Island.