Emakumeek komunikabideetan duten presentziaz, asteartean, 'Faktoria'n

Emakumeek zein leku betetzen dute komunikabideetan? Nolako presentzia dute hedabideetan? Gai horri helduko diogu Arantxa Gutierrez EHUko irakaslearekin, astearteko 'Faktoria' saioan. Gainera, Arantza Aurrekoetxea Hezkuntza sailburuordearekin hitz egingo dugu kultur eragileekin egindako bileraz. Magazinean, gainera, Gabonei begira jarriko gara.

07:00etan hasiko da saioa eguneko albiste nagusien errepasoarekin. 08:00etan, Maite Artolak hartuko du gidaritza, eta Arantza Aurrekoetxea Hezkuntza sailburuordearekin hitz egingo du hasierako tartean, Jaurlaritzak hezkuntza eragileekin egindako bileraren berri emateko. Santa Luzia azokara joko dugu, Igotz Alkortarekin bat egitera. 08:30ean, solasaldian izango ditugu Iñaki Galdos, Laura Mintegi eta Mikel Aramendi.

09:00etan, Arantxa Gutierrez EHUko irakaslearekin hitz egingo dugu emakumeek komunikabideetan betetzen duten rolaz. 09:30ean, aldiz, elkarrekin ari diren talde pluralak aztertuko ditugu, 3 adibide ardatz hartuta: Gasteiz Irekia, Gizakia herritar eta Hazi ta ikasi. Azkenik, Eli Larrinagaren sinadura izango dugu.

10:00etan, Manu Etxezortuk hartuko du lekukoa, 'Faktoria Magazina' abiatzeko. Lehenik eta behin, Donostian, Kontxa pasealekuan Eguberrietarako jarri duten hamar metroko bola argiztatuari buruz hitz egingo dugu. Jendeak harriduraz hartu du, eta Gabonetako piezarik ikusiena da Gipuzkoako hiruruan. Jendearen iritzia bilduko dugu. Jarraian, aktualitatea puri-purian ekarriko digu Jon Santxezek. Kirol aurrerapenaren ondoren, 'Ekosfera'ren leihoa zabalduko du Jokin Aldazabalek, eta Jabi Larrinagarekin batera, ondorengo gaiari buruz hitz egiteko: liztor beltza Bizkaian.

11:00etan, kirol lehiaketekin ito, eta uztea erabaki duen Leire Agirrezabala mendi lasterkariarekin ariko gara solasean. 11:30ean, Carlos Cidek eta Xabier Amurizak 2016an Googlen gehien bilatu diren gauzak hartuko dituzte ardatz.

12:00etan, 'Sukaldari Dema' izango dugu Pili Manterolarekin eta Igor Zalakainekin. Gabonetako azkenburukoak ekarriko dizkigue. Saioa amaitu aurretik, Amancay Gaztañagarekin ere hitz egingo dugu.

07:00etatik 13:00etara ariko da lanean 'Faktoria'.