Unai Rementeria Bizkaiko ahaldun nagusia, asteartean, 'Faktoria'n

Unai Rementeria Bizkaiko ahaldun nagusia elkarrizketatuko dugu, asteartean, 'Faktoria'n. Gainera, eitb.eus-en 20. urteurrenari begiratuko diogu, eta Ainhoa Quinto ere ezagutuko dugu, epaile izateko oposaketak gainditu dituen 23 urteko gazte donostiarra.

07:00etan hasiko da saioa eguneko albiste nagusien errepasoarekin. 08:00etan, Maite Artolak hartuko du gidaritza. 08:30ean, solasaldian izango ditugu Mikel Aramendi, Laura Mintegi eta Iñaki Galdos. 09:30ean, Unai Rementeriarekin hitz egingo dugu. Gainera, Eli Larrinagaren sinadura ere jasoko dugu, uraz hitz egiteko.

10:00etan, Manu Etxezortuk hartuko du lekukoa, 'Faktoria Magazina' abiatzeko. Lehenik eta behin, Ainhoa Quinto ezagutuko dugu. 23 urte ditu, eta epaile izateko oposaketak gainditu berri ditu donostiar honek. Ez da batere ohikoa hain gazterik epaile izatea lortzea. Jon Santxezek aktualitatea puri-purian ekarriko digu gero. Kirol aurrerapena entzun ondoren, 'Ekosfera' saioaren leihoa zabalduko du Jokin Aldazabalek.

11:00etan, eitb.eus-en 20. urteurrenaren haritik, Interneten hastapenak izango ditugu gogoan Joxerra Aizpurua industria ingeniariarekin eta Ana Zubiaga genetika irakasle eta ikerlariarekin. 11:30ean, Carlos Cid eta Xabier Amuriza direnez eta ez direnez arituko dira.

12:00etan, 'Sukaldari Dema' izango dugu Pili Manterolarekin eta Igor Zalakainekin. Orburuak prestatuko dituzte gure bi sukaldariek. Saioa amaitu aurretik, Amancay Gaztañagarekin ere hitz egingo dugu.

07:00etatik 13:00etara ariko da lanean 'Faktoria'.