Haurdunaldi subrogatua eta Battitta Ducassou pilotaria, 'Faktoria'n

Haurdunaldi subrogatuaz eta errealitate horren gaineko araudiaz ariko gara ostiral honetan, 'Faktoria' saioan. Euskal alderdi politikoek duten jarrera jasoko dugu, eta errealitate hori arautzeko Espainiako batzorde bioetiko bat lantzen ari den proposamenaren berri jasoko dugu. Batzorde horretako ponentzian parte hartu du Itziar Alkorta EHUko Zuzenbide irakasle eta Bioetikan aditua. Iñaki Agirrezabalagak (haurdunaldi subrogatua erabili zuen aita izateko) ere parte hartuko du irratsaioan. Tarte berezi hori 09:00etatik aurrera izango da entzungai. Gainera, Imanol Agirretxe Realeko jokalaria zorionduko dugu bere 30. urtebetetzean, eta Battitta Ducassou pilotaria elkarrizketatuko dugu, Berezkoen Buruz Buruko txapelketa irabazi berritan.

Saioa 07:00etan hasiko da, eguneko albiste nagusien errepasoarekin. 08:00etan, Maite Artolak hartuko du 'Albiste Faktoria'ren gidaritza. 08:30ean, solasean arituko dira Mikel Aramendi, Edurne Egaña eta Maite Ubiria. 09:00etako albiste errepasoaren ostean, haurdunaldi subrogatuaren gaiari helduko diogu. 09:30ean, alkateen solasaldia izango dugu. Azpeitiko Eneko Etxeberriak eta Zumarragako Mikel Serranok hartuko dute parte, besteak beste, plusbalioaz hitz egiteko.

10:00etan, Manu Etxezortuk hartuko du lekukoa. Hasteko, Mikel Gartziak eta Jurdan Arretxek asteko titularrak aztertuko dituzte. Kirol aurrerapena egin ondoren, Urdaibai Bird Center zentroarekin bat egingo dugu, Edorta Unamunorekin hitz egiteko.

11:00etan, Battitta Ducassou elkarrizketatuko dugu. 11:30ean, Eneritz Borinaga boxeolariarekin hitz egingo dugu, eta, jarraian, Iñaki Elorza gure 'Katedra' saioko lankidearekin ariko gara antolatu duen entzierro musikatuaz.

12:00etan, Nagore Telleriak asteburuan 'Amarauna' saioan izango dituzten eduki nagusien aurrerapena egingo digu. Gainera, Ane Muñozen zinemarako proposamena entzungo dugu, eta zinema-aretoetan ikusgai izango diren lanen berri ere jasoko dugu.

07:00etatik 13:00etara arituko da lanean 'Faktoria'.