Sandra Barrenetxea, bere tortura salaketaren auziaz, 'Faktoria'n

Astelehen honetan, Sandra Barrenetxea izango dugu 'Faktoria'n. Ekin auziarekin lotuta atxilotu zutenean izandako tortura salaketa asteartean iritsiko da epaitegietara. Lau guardia zibil eseriko dira Bizkaiko Probintzia Auzitegiko akusatuen aulkian. Bestalde, Baigorriko Etxauzia gaztelua erosi, eta Nafarren Etxe bihurtzeko ahaleginean beste urrats bat ematea erabaki dute. Zabal eta Bizi izeneko kanpaina abiatzera doaz, eta Kattalin Sainte Marie koordinatzaile nagusiarekin hitz egingo dugu.

07:00etan hasiko da saioa eguneko albiste nagusien errepasoarekin. 08:00etan, Maite Artolak hartuko du 'Albiste Faktoria'ren gidaritza. 08:30ean, solasaldian izango dira Iñaki Galdos, Martin Garitano eta Jesus Prieto. 09:00etako albiste errepasoaren ondoren, Legorretan egingo duten erreferendumaren biharamunean, azken aldi honetan Gipuzkoako herri askotan zabor bilketaren inguruan lortzen ari diren akordioei erreparatuko diegu, solasaldiaren tartean. 09:40ean, Sandra Barrenetxearekin hitz egingo dugu. Saioa amaitu aurretik, gainera, Bernardo Atxagaren sinadura izango dugu.

10:00etan, 'Faktoria Magazina' jarriko du martxan Manu Etxezortuk. Hasteko, Kattañin Saint Marierekin mintzatuko gara Baigorriko Etxauzia gazteluaz. Jarraian, Maysharekin hitz egingo dugu. Kirol aurrerapenaren ostean, Martin Gartziandia Gasteizko sindikoa arituko zaigu, hirietako bizikleten istripuez.

11:00etako ordua kirol solasaldiarekin hasiko da. Beñat Zarrabeitiak eta Andoni Urbistondok asteburuko kirol emaitzak eta gertakariak aztertuko dituzte. 11:30 aldera, auto elektrikoan txangoa egitera joango da Oihane Egurtza, 'Ekosfera'ko gidari, Jokin Aldazabalekin.

12:00etan, Kutxa Ekogunearen tartea zabalduko dugu Mikel Insaustirekin, baso eskolari buruz aritzeko. Saioa amaitu aurretik,jakina , Tania Arriagaren tartea izango dugu.

07:00etatik 13:00era, martxan izango dugu 'Faktoria'.