Nagore Legarreta argazkilariaren lana ezagutuko dugu, 'Faktoria'n

Gero eta ezagunagoa egiten ari den Nagore Legarreta argazkilariaren lana ezagutuko dugu, asteazken honetan, 'Faktoria'n. Argazkilaritza estenopeikoa egiten du berak. Bestalde, ondorengo galderei erantzuten saiatuko gara: Nolakoa izan behar du XXI. mendeko nekazaritzak? Gaur egun nagusi den agroelikadura sistemaren aldean bestelako eredurik sortu al liteke? Elikadura Burujabetzarako bidea egingarria al da? Bestelako kontsumo, nutrizio eta osasun ereduen inguruan hausnartuko dute datorren astean Gasteizen. Astelehenetik asteazkenera bitartean, nazioartetik etorritako aditu eta ekintzaileak elkartuko dira Europa Jauregian. Etxalde nekazaritza iraunkorraren aldeko ekimenak eta ICAS nekazaritzari buruzko ikerketa kritikoen taldeak antolatu dute nazioarteko ekitaldia. Antolatzaileetako bat, Unai Aranguren EHNEko eta Vía Campesinako kidea, gurean izango dugu.

07:00etan hasiko da saioa, eguneko albiste nagusien errepasoarekin. 08:00etan, Maite Artolak hartuko du gidaritza. Hasteko, Josu Chueca historialariarekin arituko gara, nazien kontzentrazio esparruetako euskaldunei buruz. 08:30ean, solasaldian izango dira Javier Diaz Noci, Hedoi Etxarte eta Eguzki Urteaga. 09:00etako albiste errepasoaren ostean, Oier Gomez presoaz eta haren kartzelaldiaren gainean Parisen hartzekoa den erabakiari buruz ere arituko gara Oiertxo SOS plataformako kide batekin. 09:30ean, Unai Aranguren EHNEko eta Vía Campesinako kidea elkarrizketatuko dugu.

10:00etan, Ainhara Zuazabeitiak hartuko du lekukoa. Hasteko, Nagore Legarreta argazkilariarekin hitz egingo dugu. Kirol aurrerapena izango dugu ondoren, eta Juanjo San Miguel lankideak Frantziako hauteskundeei buruz hitz egingo digu.

11:00etan, Ordiziako Artzain Eguna izango dugu hizpide. Beñat Larruquert ezagutuko dugu gero, zalantzarik gabe, bizitzan topatzen diren oztopoak gainditzeko adibide bat da hondarribiarra. 11:30ean, Arantzazu Fernandezekin eta Amaia Nausiarekin berriketan arituko gara, turismoaren gorakadaz.

12:00etan, Maribi Unamunok Alaia haur kanten CDa aurkeztuko digu, gure ondarea zabaltzeko tresna. Saioa amaitzeko, Imanol Ituiñoren irrati-magia izango dugu.

07:00etatik 13:00etara izango dugu martxan 'Faktoria'.