Gervasio Gabirondo, Ertzaintzako burua, ostegunean, 'Faktoria'n

Gervasio Gabirondo Ertzaintzako zuzendari nagusia izango dugu ostegunean gonbidatu Euskadi Irratiko 'Faktoria'n. Gainera, txirrindulariek izaten dituzten harrapaketez hitz egiteko hartuko dugu tartea. Michele Scarponirik gabeko Giroa abiatu bezperatan, txirrindulariek izan ohi dituzten istripuak zenbatuko ditugu eta trafiko arauak errepasatuko. Bi lagun gonbidatu ditugu euren testigantza eta ikuspuntua eman dezaten: Zuriñe Larrinagak anaia zuen txirrindularia eta errepidean hil zen, istripuz. Aitor Artza, aldiz, txirrindularia da. Bestalde, Abel Barriola Leitzako pilotariak igandean jokatuko du profesionaletako azken partida. Bere herritarren iritziak bilduko ditugu, eta lehenengo aldiz pilotalekura joango den emakume leitzarrarekin ere hitz egingo dugu. Abelen agurreko partidara joango da Maria Jesus Zubillaga.

07:00etan hasiko da saioa, eguneko albiste nagusien errepasoa eginez. 08:00etan, Maite Artolak hartuko du albistegiaren gidaritza. 08:30ean, Joseba Arruti, Nerea Azurmendi eta Martxelo Otamendi kazetariek egingo dute aktualitatearen analisia. 09:00etan, Gervasio Gabirondok Maite Artolaren galderei erantzungo die. 09:30 aldera, Ibon Sarasolaren gomendioak entzungo ditugu. Oraingoan, 'harremandu' esamoldea izango du hizpide. Jarraian, txirrindulariek izaten dituzten harrapaketez ardungo gara.

10:00etatik 13:00etara, berriz, Manu Etxezortuk hartuko du lekukoa, eta magazinak egingo du bidea. Lehen-lehenik, Leitzara joko dugu, Abel Barriolaren agurrari buruzko iritziak biltzera. Ondoren, garagardo markei buruzko hainbat informazio interesgarri ekarriko dizkigu Joseba Kamio publizistak. Kirol aurrerapenaren ostean, Markos Zapiainen filosofia eskola jasoko dugu.

11:00etan, konpositoreei eskainitako txokoan, Mikel Chamizok txistu doinuak ekarriko dizkigu, eta Jon Ansorena txistularia ekarriko du gonbidatu gisa. 11:30ean, Esther Moyuaren liburu gomendioa jasoko dugu gero.

12:00etan, Gaskoi hizkuntzari buruzko xehetasun guztiak emango dizkigu Gaskoi Akademiako kide berriak, Franck Dolosor kazetariak. 12:30ean, Murgiako Eko Rallyaren berri jasoko dugu.

07:00etatik 13:00etara izango dugu martxan 'Faktoria'.