Albisteak
Birmoldatzeko lanak hasita
Anoeta estadioan izango da 'Faktoria', ostegunean
G.U. | ERREDAKZIOA
Maite Artolak gidatzen duen albistegian, Anoeta birmoldatzeko proiektuaren xehetasun guztiak bertatik bertara ezagutuko ditugu. Irati Andaren bisita izango dugu magazinean.
Urte luzetako eztabaida, saiakera, helegite eta arazoren ostean, aste honetan hasi dira Anoetako estadioa birmoldatzeko lanak. Aurreikuspenak betez gero, 2019rako egongo da prest futbol zelai berria. Proiektuaren xehetasun tekniko eta ekonomiko guztiak bertatik bertara ezagutuko ditugu ostegunean, Euskadi Irratiko 'Faktoria' saioan. Joseba Ibarburu Realeko zuzendaritzako kidearekin eta Iñaki Gurrutxaga Donostiako Alkatetza Kabineteko zuzendariarekin egin dugu hitzordua. Gainera, Irati Andaren bisita izango dugu magazinean.
07:00etan hasiko da saioa, eguneko albiste nagusien errepasoa eginez. 08:00etan, Maite Artolak hartuko du albistegiaren gidaritza. 08:30ean, Joseba Arruti, Jesus Prieto eta Martxelo Otamendi solaskideek egingo dute aktualitatearen analisia. Besteak beste, EAren barne eztabaida eta Mexikon kazetariekin gertatzen ari dena izango dute hizpide. 09:30 aldera, Ibon Sarasolaren gomendioak entzungo ditugu. Jarraian, Anoeta estadiora joko dugu, Oihane Yustos lankidearekin.
10:00etatik 13:00etara, berriz, Manu Etxezortuk hartuko du lekukoa, eta magazinak egingo du bidea. Lehen-lehenik, Alavesek eta Barçak jokatuko duten Errege Kopako finala izango dugu hizpide, zale amorratu batekin, Ane Miren Atinekin. Ondoren, Idoia Torregaraik umore printza ekarriko digu. Kirol aurrerapenaren ostean, Markos Zapiainen filosofia eskola jasoko dugu. Gainera, eskoletako ghettifikazioaz hitz egingo digu Martin Gartziandia Gasteizko sindikoak.
11:00etan, Mikel Chamizoren musika konpositoreen biografien tartea izango dugu, Jesus Guridiz hitz egiteko. 11:30ean, Esther Moyuaren liburu gomendioa jasoko dugu.
12:00etan, entzuleen perlak ekarriko dizkigu Gorka Otaegi lankideak. Horren ostean, Irati Andaren bisita izango dugu. Euskal Herriko Mendi Federazioko zuzendari teknikoa da, eta azkenaldian telebistako aurpegi ezaguna ere bai, ETB1eko 'Gailurra' saioan aurkezleetako bat baita. 12:30ean, errefuxiatuei laguntzeko Zarautzen antolatutako bigarren eskuko azokaren berri emango dugu.
07:00etatik 13:00etara izango dugu martxan 'Faktoria'.
