Albisteak
Batzarraren biharamunean
Imanol Landa, Eudeleko presidentea, ostiralean, 'Faktoria'n
Gainera, Bitxigintza Artistikoko Goi Mailako zikloa bukatu duten bi lagun izango ditugu, eta Euskal Eskola Publikoaren aldeko festaren atarikoak ere jasoko ditugu.
Ostiralean, Eudelek batzarra egin eta biharamunean, 'Faktoria'n izango dugu Imanol Landa udal elkarteko presidente eta Getxoko alkatea. Gudrun Mosler-Törnström Europako Toki eta Eskualde Botereen Kongresuko lehendakariarekin batera izango da Legebiltzarrean, eta handik mintzatuko zaigu Eudelez eta tokiko erakundeek Europan izan behar duten tokiaz, 09:30etik aurrera. Horren aurretik, Nafarroari ere begiratuko diogu: alde batetik, larunbaterako Nafarroako banderaren defentsan deitu duten manifestazioko antolatzaileekin mintzatuko gara; eta bestetik, Nafarroako hegoaldean lehorteak eragin dituen kalte eta arriskuei buruz jardungo dugu. Gainera, Bitxigintza Artistikoko Goi Mailako zikloa bukatu duten bi lagun izango ditugu, eta Euskal Eskola Publikoaren aldeko festaren atarikoak ere jasoko ditugu.
Saioa 07:00etan hasiko da, eguneko albiste nagusien errepasoarekin. 08:00etan, Iñigo Alustizak hartuko du 'Albiste Faktoria'ren gidaritza. Niko Cuencaren ekonomia azalpenen ostean, 08:30ean, solasean arituko dira Laura Mintegi, Edurne Egaña eta Felipe Juaristi. Gainera, Unai Ortuzarrekin egin dugu zita, PSE-EEren idazkari nagusirako hautagai izateko bidean Idoia Mendiak izango duen aurkariarekin. 09:00etako albiste errepasoaren ostean, Nafarroako banderaren defentsan egingo duten manifestazioaz ariko gara. 09:30 aldera, Nafarroako hegoaldean dagoen lehortea izango dugu hizpide EHNEko Nafarroako presidente Imanol Iberorekin. 09:45 aldera izango dugu Imanol Landa gurekin, Legebiltzarretik.
10:00etan, Ainhara Zuazabeitiak hartuko du lekukoa. Hasteko, Mikel Gartziak eta Jurdan Arretxek asteko titularrak aztertuko dituzte. Kirol aurrerapena egin ondoren, Urdaibai Bird Center zentroarekin bat egingo dugu, Edorta Unamunorekin hitz egiteko. Gainera, hontza etxean jaio zaion familia baten gorabeherak ere ezagutuko ditugu.
11:00etan, bitxigintza artistikoaz ariko gara Goi Mailako gradua amaitu berri duten Idoia Lizeagarekin eta Agara Agirrerekin. 11:30ean, Garbiñe Agiriano psikologoaren tartea zabalduko dugu, sekretuez hitz egiteko. Gainera, Euskal Eskola Publikoaren aldeko festaren atarikoak ere jasoko ditugu.
12:00etan, Nagore Telleriak asteburuan 'Amarauna' saioan izango dituzten eduki nagusien aurrerapena egingo digu. Ondoren, Ane Muñozen film proposamena entzungo dugu, eta zinema karteldegiari ere begiratuko diogu.
07:00etatik 13:00etara arituko da lanean 'Faktoria'.
