Jonan Fernandez, asteazkenean, 'Faktoria'n

Jonan Fernandez, Eusko Jaurlaritzako Giza Eskubide, Bizikidetza eta Lankidetzaren idazkaria, 'Faktoria'ko gonbidatu nagusia izango da asteazkenean. Goizeko 09:00etan egingo dio elkarrizketa Maite Artolak. Magazinean, bestalde, Emakumeen Etxeen lana ezagutuko dugu, Azpeitiko INOXen iragarri duten lujuria festa faltsuaren inguruko argibideak emango dizkigute dantzalekuaren jabeek eta Mikel Kartonen musika izango dugu.

07:00etan hasiko da saioa, eguneko albiste nagusien errepasoarekin. 08:00etan, Maite Artolak hartuko du gidaritza. 08:30ean hasiko da solasaldia, Eguzki Urteagarekin, Mikel Aramendikin eta Javier Diaz Nocirekin. 09:15 aldera, Jonan Fernandezen elkarrizketa izango dugu. Koldo Almandozen zinema gomendioak itxiko du albistegia.

10:00etan, Manu Etxezortuk hartuko du lekukoa, magazina abiatzeko. Yoga eginaz hasiko dugu eguna, udari ongi etorria emateko. Izan ere, Yogaren Nazioarteko Eguna izango da. Harkaitz Ibaiondo etorriko zaigu laguntzera. Kattalin Minerren tartea izango dugu gero, eta, kirol aurrerapenaren ondoren, Juanjo San Miguel lankideak Brexitaren negoziazioaz hitz egingo digu.

11:00etan, EiTBren "Ez beti ez da" kanpaina izango dugu hizpide. Lelo horren haritik, Emakumeen Etxeek egiten duten lana ezagutuko dugu. Maialen Otermin lankidea Donostiako Emakumeen Etxean izan da, eta beste herri batzuetako ahaleginak ere jaso ditu. 11:30ean, Arantzazu Fernandezekin arituko gara berriketan, debekatutako gauzen erakargarritasunaz. Jarraian, Azpeitiko Inox dantzalekuan iragarri duten lujuria festa faltsuaren inguruko argibideak ere emango dizkigute dantzalekuaren jabeek. Bestalde, Arcelor Mittal lantegian ateratako argazkien bidez, altzairutegia barrutik ezagutuko dugu. Javier Alonso argazkilariak erakusketa du jarrita Zelai Ariztin.

12:00etan, zuzeneko musika eskainiko digu estudioan Mikel Karton donostiarrak. Saioa amaitzeko, Imanol Ituiñoren irrati bidezko magia izango dugu.

07:00etatik 13:00etara izango da martxan 'Faktoria'.