Albisteak
Asteazkenean
Kataluniaren etorkizun ekonomikoaz eta fibrosi kistikoaz, 'Faktoria'n
ERREDAKZIOA | G.U.
Joseba Barandiaran gure ekonomia adituarekin eta Josu Tornay enpresariarekin hitz egingo dugu Kataluniaren etorkizun ekonomikoaz. Bestalde, fibrosi kistiko gaitza hurbiletik ezagutzen saiatuko gara.
Asteazkenean ekonomiari leihoa zabaldu ohi diogu 'Faktoria' albistegian. Bada, aste honetan, Kataluniaren etorkizun ekonomikoa izango dugu hizpide Joseba Barandiaran gure ekonomia adituarekin eta Josu Tornay enpresariarekin. Gainera, Ertzaintzaren Erne sindikatuko Iñaki Andonegirekin ere hitz egingo dugu zerbitzuz kanpo ere pistola eraman ahal izateko eskaeraz. Bestalde, magazinean, fibrosi kistikoaz egingo dugu berba, ohikoena den gaitz arraroaz, berba David Lopez afektatuarekin eta Bikendi Gonzalez Euskadiko Fibrosi Kistikoaren Elkarteko lehendakariordearekin.
07:00etan hasiko da albistegia, Igotz Alkortaren gidaritzapean. 07:50ean, Maite Artolak hartuko du lekukoa, eta Eli Larrinagaren iritzi tartea entzungo dugu. 08:30ean, Mikel Aramendi, Javier Díaz Noci eta Amaia Espinosa izango ditugu solasaldian.
09:00etan, Donostiako Zinemaldian ikusi beharrekoaz ariko zaigu Begoña Del Teso. Jarraian hitz egingo dugu Erne sindikatuko bozeramailearekin. 09:30ean, ekonomia tartea izango dugu, asteazkenero legez. Joseba Barandiaranekin eta Josu Tornay enpresariarekin aztertuko dugu Kataluniaren etokizun ekonomikoa.
10:00etan, Manu Etxezortuk hartuko du lekukoa, magazina abiatzeko. Hasteko, Idoia Torregarairen umore printza iritsiko zaigu. 10:30ean, Juanjo San Miguel lankidearekin aztertuko dugu Alemaniako hauteskundeen ondorena eta hauteskunde horien emaitzek zein eragin izango dute Europar Batasuneko erakunde zein beste herrialdeetan izango ditugu mintzagai. 11:00etan, sartu-irtena egingo dugu Donostiako Zinemalditik, eta, ondoren fibrosi kistikoa hartuko dugu ardatz. 11:30ean, Gure Zirkua proiektuaren berri emango digu Iker Galartza aktoreak.
12:00etan, Esther Moyuaren liburu gomendioa entzungo dugu. Ondorean, ETB1eko 'Izan Invictus' saio berria zertan datzan azalduko digu Joxan Goñi zuzendariak. Lady Gagak bere kontzertu bira bertan behera utzi izanaz ariko gara. Jarraian, elikagai iraultza eztabaidagai izango dugu Bittor Rodriguezekin. 12:30ean, Imanol Ituiñoren magia izango dugu, astero legez.
