Arantxa Tapia sailburua elkarrizketatuko dugu 'Faktoria'n

Arantxa Tapia izango da ostiral honetako  'Faktoria' saioko elkarrizketatu nagusia. Ekonomiaren Garapena eta Lehiakortasuneko sailburuak Oihane Yustosen galderei erantzungo die 09:15 aldera. Lehenago, Fabian Laespada eta Iban Zaldua izango ditugu iritzi emaile,  eta Javier Arrieta, Eguzki Urteaga eta Hedoi Etxartek aktualitatearen analisia egingo dute 08:30ean. Magazinean, bestealde, Izan EiTB jaiari buruzko xehetasunak kontatuko ditugu, eta gorputz heziketa aktiboa eta gazte ekintzailetza ere izango ditugu hizpide.

07:00etan hasiko da albistegia. Eguneko berri nagusien errepasoa egin ondoren, 07:50ean Oihane Yustosek hartuko du lekukoa. Ordua ixteko, Fabian Laespadaren iritzi tartea entzungo dugu. 08:30ean, solasaldian izango ditugu Javier Arrieta, Eguzki Urteaga eta Hedoi Etxarte. 09:00etako albiste errepasoaren ondoren, Arantxa Tapia elkarrizketatuko dugu. Ordua amaitzeko, Iban Zalduaren printza entzungo dugu.

10:00etan hartuko du lekukoa Manu Etxezortuk. Magazinaren hasieran, astearen prentsa errepasoa egingo digute Jurdan Arretxek eta Mikel Garciak. 10:30 aldera, Bilbora joko dugu. Izan EiTB jaia izango da larunbatean, eta bertan aurkeztuko dute 'Go!azen' telesail ezaguneko denboraldi berria. Iholdi Beristain abeslaria izango da denboraldi berriko aurpegi berrietako bat, 'Bago!az' lehiaketa irabazi zuelako. Gurean izango dugu abeslaria. Eta jaia nolakoa izango den kontatuko digu Joseba Olagarai aurkezleak. 11:00etako kirol aurrerapenaren ondoren, gorputzaren heziketa aktiboa jorratuko dugu Daniel Berasategi fisioterapeutarekin. Gorputzak bidaltzen dizkigun mezuei kaso egiten erakutsiko digu. 11:30 aldera, Ane Muñozen bizitza pasadizoak entzungo ditugu. 11:45ean, gazte ekintzaileen topaketan  sartuko gara Bilboko Bizkaia aretoan. 30 urte bete baino lehen milioi bat euro lortzeko helburua duten gazte ekintzaileekin egin dugu hitzordua.

12:00etan asteburuan 'Amarauna' saioan landuko dituzten gaiak aurreratuko dizkigu Nagore Telleriak. Ondoren, Urdaibai Bird Centerrera joko dugu Edorta Unamunorekin, eta zinema karteldegiaren berri ere emango dugu

07:00etatik 13:00etara, martxan izango da 'Faktoria'.