Albisteak
Ostiralean
'Handia' filmaren aurrestreinaldia egingo dugu 'Faktoria'n
ERREDAKZIOA | G.U.
Zineman estreinatuko den egun berean, zuzendariak, aktoreak eta ekoizlea izango ditugu. Gainera, Audience taldekoek hiru abesti joko dituzte zuzenean. Streaming bidez emango dugu saioa eitb.eus-en.
Handia filma zinema aretoetan izango da ikusgai ostiraletik aurrera. Goiz horretan, baina, aurrestreinaldia egingo du Euskadi Irratiak EiTBren Bilboko egoitzan, eta ekitaldi horri lotuta, 'Faktoria' magazina zuzenean egingo dugu gure egoitzaren ataritik. Aitor Arregi eta Jon Garaño zuzendariak, Xabier Berzosa ekoizlea, eta Eneko Sagardoi, Joseba Usabiaga, Iñigo Aranburu eta Ramon Agirre aktore nagusiak gurekin izango ditugu. Gainera, Audience talde gernikarrak hiru abesti joko ditu zuzenean. Saio osoa streaming bidez izango dugu ikusgai eitb.eus-en, Euskadi Irratia eta 'Faktoria' atarietan.
07:00etan hasiko da albistegia, Igotz Alkortak gidatuta. Eguneko berri nagusien errepasoa egin ondoren, 07:50 aldera, Maite Artolak hartuko du lekukoa. Ordua ixteko, Fabian Laespadaren iritzi tartea entzungo dugu. 08:00etan, Niko Cuencaren ekonomia azalpenak entzungo ditugu. 08:30ean, solasaldian izango ditugu Javier Diaz Noci, Eguzki Urteaga eta Mikel Aramendi. 09:00etako albiste errepasoaren ostean, Miguel Lazpiaur elkarrizketatuko dugu. ETAren estortsioa jasan zuten enpresariei Confebaskek omenaldia egingo dien egunean, egingo dio elkarrizketa Maite Artolak. Eskutitzak nola jasotzen hasi zen eta familian iraultza zerga deitutakoa ez ordaintzeko erabakia nola hartu zuten kontatuko du, besteak beste. 09:00etatik aurrera izango da hori, solasaldiaren ondoren. Ostiraleko saioari errematea Iban Zaldua idazleak jarriko dio musikaz.
10:00etatik aurrera izango da saio berezia Bilboko egoitzatik, Handia fimaren aurrestreinaldia dela eta; 13:00etara martxan izango da 'Faktoria'.
