Albisteak
Ostegunean
'Faktoria' berezia, Kataluniatik
ERREDAKZIOA | G.U.
Maite Artola eta bere lan-taldea Kataluniatik arituko dira goiz eta arratsalde. Bestalde, San Tomas egunari ere erreparatu diogu.
Ostegunean, hauteskunde egun berezian gertatzen den guzti-guztiaren kontakizuna egingo du 'Faktoria'k Katalunia bertatik. Maite Artolak zuzendu eta aurkeztuta, Oihane Yustosek, Oihane Perezek, Ane Agirrek eta Iratxe Ruizek egingo digute hauteskunde eguneko kontakizuna, Igor Martinez de Lezea teknika lanetan lagun dutela. Goizeko solasaldi tertulia berezian aztertuko ditugu, Joxe Ramon Beloki, Ramon Etxezarreta eta Maite Ubiriarekin.
Arratsaldean, 19:30ean hasita, hauteslekuak itxi atari-atarian, helduko dio berriz Maite Artolak saio bereziari. Iñaki Galdos, Jesus Egiguren, Javier Diaz Noci eta Martin Garitano laguntzaile dituela, aletuko dituzte botoen kontakizunak ematen dituen datu guzti-guztiak.
07:00etan hasiko da saioa. 07:50 aldera, Maite Artolak hartuko du lekukoa Kataluniatik, eta Aingeru Epaltzaren sinadura entzungo dugu. 08:00etan, San Tomas egunari begiratuko diogu lehenik. 08:30ean, Joxe Ramon Beloki, Ramon Etxezarreta eta Maite Ubiria izango ditugu solasaldian, aktualitateari errepasoa egiten. Gainera, Katalunian inkestak egitea bereziki izan da zaila, eta horri buruz ariko zaigu Asier Etxenike Aztikerreko ikertzailea.
09:20ean, Pasaiara joko dugu, bertan inprimatutako boto-paperak erabiliko baitituzte hauteskundeeetan, eta, segidan, Ibon Sarasolaren euskara gomendioak jasoko ditugu. 09:35ean, intersexualitatea zer den kontatuko digu Nerea Gonzalez Donostia Ospitaleko zirujau pediatrikoak, Alemanian intersexualitatea ofizialki onartu dutela aitzakia gisa hartuta.
10:00etan, magazina jarriko dugu martxan. Hasteko, San Tomas eguneko azoketara joko dugu, eta, ondoren, Mireia Roca arkitekturaz ariko zaigu, zehatzago esanda, Karmelo Balda pilotalekuaz. 10:30ean, hemengo kataluniarrak nola begira dauden jakingo dugu, Kataluniari ala San Tomaseko azokari. 11:00etako kirol aurrerapenaren ondoren, Mikel Chamizo musikagileak Gabonak ekarriko dizkigu, baina beste ikuspuntu batetik, eta Donostiako San Tomas azokan murgilduko gara gero.
12:00etan, Kattalin Minerren burutazioak entzungo ditugu, eta ondoren, feminismoaren aldarrikapenak belaunaldiz belaunaldi ekarriko dizkigu Maitane Subijanaren erreportajeak. 12:30ean, San Tomas eguneko azokara joko dugu Bilbora.
19:30ean hasita, Kataluniatik osatuko dugu hauteskundeei buruzko saio berezia.
