Bilboko manifestazioaren atarian, Araitz Zubimendi, 'Faktoria'n

Sarek larunbaterako Bilbon deitu duen manifestazioaren bezperan etorriko da Araitz Zubimendi 'Faktoria'ra. Bere esperientzia eta testigantza eskaintzeaz gainera, Sara Majarenasen eta  Izar alabaren egoeraren berri ere emango du, familiako bozeramaile izaki. 09:15 inguruan hasita egingo dio elkarrizketa Maite Artolak. Magazinean, bestalde, errefuxiatuentzat ogia egitera Greziara joan da Aida Fuentes eta bertatik kontatuko digu zer ari diren egiten. Eneko Axpe, Maishak, berriz, ilearen zientzia aztertuko digu.

07:00etan hasiko da albistegia, Iñigo Alustizak gidatuta. 07:55 aldera, Maite Artolak hartuko du lekukoa, eta Fabian Laespadaren sinadura entzungo dugu. 08:30ean, solasaldian, Javier Arrieta, Eguzki Urteaga eta Hedoi Etxarte arituko dira aktualitatearen analisia egiten eta, besteak beste, aztertuko dituzte Nafarroako Parlamentuan kontziliazioa bultatzeko hartu dituzten neurriak. 09:15 aldera elkarrizketatuko dugu Araitz Zubimendi, eta, ostiraleko azken txanpan, Iban Zalduak musikaz jarriko die errematea asteko albisteei.

10:00etan hartuko du lekukoa Manu Etxezortuk. Magazinaren hasieran, astearen prentsa errepasoa egingo digute Jurdan Arretxek eta Mikel Garciak. Ondoren, Eibarren Coffin Sidis gaitz arraroa duen Aroa neskatoaren alde egingo duten bazkariaz arituko gara Olatz Etxeberria antolatzaile eta familiaren lagunarekin.

11:00etako kirol aurrerapenaren ondoren, greziara errefuxiatuentzat ogia egitera joan den Aida Fuentesekin hitz egingo dugu, eta, segidan, Cabo Verdera joko dugu. Han izan da Ander Rozas, bertako baliabideekin Eguberriak alaitzen, eta kontatuko digu zer egin duen. 11:30 aldera, ilearen zientzia aztertuko digu Eneko Axpe Maishak.

12:00etan, asteburuan 'Amarauna' saioan landuko dituzten gaiak aurreratuko dizkigu Gari Udabek. Ondoren, Urdaibai Bird Centerrera joko dugu Edorta Unamunorekin hitz egitera, eta zinema-aretoetan ikusgai izango diren lanen berri ere emango dugu.

07:00etatik 13:00etara, martxan izango da 'Faktoria'.