Juan Mari Aburto, Bilboko alkatea, 'Faktoria'n

Juan Mari Aburto Bilboko alkatea izango da asteleheneko ' Faktoria' saioko gonbidatu nagusia, 09:30ean. Bestalde, Osakidetzak "Bizitza osasungarria preskribitu" programa probatu du hainbat herritan, eta Otxarkoagan, esaterako, emaitza onak ari da ematen. Unitate ibiltaria hartu eta bertara joango gara astelehen goizean. ETB1eko 'Atera Kontuak' saio berriko aurkezle Ana Goitiarekin ere hitz egingo dugu.

07:00etan hasiko da albistegia. 07:55ean, Maddalen Arzallusen sinadura izango da. 08:30ean, aktualitateari buruzko solasaldian, espetxealdi iraunkor berrikusgarriari buruz arituko dira Ramon Etxezarreta, Iñaki Galdos eta Laura Mintegi, Iñaki Esparza EHUko Zuzenbide Prozesaleko irakaslearen iruzkinek lagunduta. 09:30 aldera, Juan Mari Aburto Bilboko alkatearekin hitz egingo dugu, eta, albistegia amaitzeko, Bernardo Atxaga entzungo dugu.

10:00etan, Manu Etxezortuk hartuko du magazinaren gidaritza, eta, hasteko, asteburuko kirol emaitza eta gertakizun guztiak aztertuko dituzte Andoni Urbistondok eta Beñat Zarrabeitiak kirol solasaldian. 10:30ean, Bankoa-Credit Agricole banketxearen iragarkiaren arrakastaz ariko gara. Pilotalekuan pilotariz jantzita dantzan agertzen diren dantzariak Lasala dantza taldekoak dira, eta taldeko zuzendari eta koreografoarekin, Judith Argomanizekin, hitz egingo dugu. 11:00etako kirol aurrerapenaren ostean, Euskal Herriko taldeek Donostiako Jazzaldian parte hartzeko izaten dituzten aukerak aztertuko ditugu, eta Arrigorriagara joko dugu 11:30ean, Osakidetzaren "Bizitza osasungarria preskribitu" programa nola probatu duten ikustera.

12:00etan, Kutxa Ekogunea tartea zabalduko dugu, eta Ana Goitiarekin hitz egingo dugu ondoren, ETB1en astelehenean estreinatuko duen 'Atera Kontuak' saio berriaz galdetzeko. Saioa amaitzeko, Tania Arriagaren 'Harriadak' entzungo ditugu, eta lehiaketa izango dugu.

07:00etatik 13:00etara izango da martxan 'Faktoria'.