Borondatezko ekarpenez eta hatz marken bidezko identifikazioaz, 'Faktoria'n

Ignazio Jabier Etxeberria Borondatezko Gizarte Aurreikuspeneko Erakundeen Euskadiko Federazioko presidenteari egingo diogu elkarrizketa asteazken honetako 'Faktoria'n. Euskadiko Borondatezko Gizarte Aurreikuspeneko Erakundeen Federazioak,  iazko balantzea aurkezteaz gainera, dei egin du pentsio funts osagarriak sendotzeko, batik bat enpresetakoak. Pentsio publikoak eta osagarriak hizpide diren honetan erantzungo ditu, 09:30etik aurrera, Iñigo Alustizak egingo dizkion galderak. Gainera, hatz marken bidezko identifikazioaz ere arituko gara. Apirilarekin batera, Lanbidek, modu hori, bere hamar bulegoetara zabaltzeko asmoa du. Neurriak eztabaida eragin du bere legezkotasunaz. Solasaldiaren tartean aztertuko dugu gaia, Mikel Aramendi, Iñaki Galdos eta Maite Ubiria lagun ditugula.

07:00etan hasiko da albistegia, Igotz Alkortak gidatuta. 07:50 aldera, Iñigo Alustizak hartuko du lekukoa, eta Rosa María Martin-Sabarisen iritzi-tartea entzungo dugu. 08:30ean, solasaldian izango dira Mikel Aramendi, Iñaki Galdos eta Maite Ubiria. Besteak beste, hatz marka bidezko egiaztagiriaren legezkotasunaz ariko dira. 09:00etako albistegiaren ondoren, Ordiziko Artzain Egunan sartu-irtena egingo dugu, eta  09:30 aldera, berriz, ekonomia-tartea zabalduko dugu. Ignacio Javier Etxeberria Borondatezko Gizarte Aurreikuspeneko Erakundeen Euskadiko Federazioko presidentea elkarrizketatuko dugu, eta Beatriz Plaza ekonomialaria ere izango dugu.

10:00etan, Ainhara Zuazabeitiak hartuko du lekukoa, magazina abiatzeko. Hasteko, Idoia Torregarairen umore printza izango dugu. 10:30ean, MUAK plataforma ezagutuko dugu. Bertako kide diren Nahiak eta Jon Garmendiak kontatuko digute agenda informatiboaren ertzetan geratu arren, eguneroko bizitzan garrantzitsuak diren gizarte gaientzako plataforma hau zertan datzan.

11:00etako kirol aurrerapenaren ostean, Fabian Castro txakur-kross txapeldunarekin hitz egingo dugu, eta, 11:30ean, berriz, Unai Arrieta gimnasia erritmikoko txapeldunarekin egingo dugu solas. Segidan, Esther Moyuaren liburu gomendioak entzungo ditugu.

12:00etan, Itzulia Basque Countryren berri emango digu Arritxu Iribar lankideak, eta, ondoren, Siroka musika taldeko Maria Rivero eta Gorka Chamorro etorriko zaizkigu. 12:30ean, Imanol Ituiñoren magia tartea entzungo dugu.

07:00etatik 13:00etara izango da martxan 'Faktoria'.