Ihintz Oliden, Ipar Irlandaz, 'Faktoria'n

Datorren asteartean beteko dira hogei urte Stormonteko jauregian, Ostiral Santuko Akordioak sinatu zirenetik. Ihintz Oliden Euskadi Irratiko berriemaileak Belfasten bizitzen daramatzan urte kopuru bera da hori. Ipar Irlandaren gaur egungo egoera politiko korapilotsuaz eta gizarte arloan bizi den errealitate latzaz mintzatuko zaigu 'Faktoria'n baionarra, elkarrizketa gertukoan. Gizarte langile gisa ondo ezagutzen du eguneroko gordin hori, West Belfast auzo kolpatuan dagoen bazterkeria eta suizidio maila altua, besteak beste. Politikaz, lanaz, eta bizitzaz arituko da 09:15etik aurrera, Iñigo Alustizaren galderei erantzunez.

07:00etan hasiko da albistegia, Iñigo Alustizak gidatuta. 07:55 aldera, Maite Artolak hartuko du lekukoa, eta Garbiñe Ubedaren sinadura entzungo dugu. 08:30ean,Iker Rioja, Hedoi Etxarte eta Eguzki Urteagaizango ditugu solasaldian, aktualitateari errepasoa egiten. 09:15 aldera izango dugu Ihintz Olidenen elkarrizketa. Ordua amaitzeko, Iban Zalduak astearen errepaso musikatua egingo du.

10:00etan hartuko du lekukoa Manu Etxezortuk. Magazinaren hasieran, Lore Treviñorekin hitz egingo dugu. Skyscanner hegaldi bilatzailean egin du lan eta berak esango digu hegaldietako billeteak merkeen lortzeko zenbateko aurrerapenarekin erosi behar ditugun, berriki argitaratu duten ikerketa baten arabera. Jarraian, astearen prentsa errepasoa egingo digute Jurdan Arretxek eta Mikel Garciak.

11:00etako kirol aurrerapenaren ondoren, Ane Muñozen bizitza pasadizoak entzungo ditugu, eta, 11:30ean Gazte Sortegien uzta jasoko dugu. Gaztetxoei zuzendutako sormen lantegiak antolatu dituzte Kanpezun Pazko Astean eta, lantegiaren azkeneko egunean, bertan irakasle ibili diren Oihane Perea bertsolariarekin eta Jon Basaguren musikariarekin egingo dugu berba. Baita Irune Santamaria eta Garazi Idirin parte hartzen ari diren gazte sortzaileekin ere.

12:00etan, Itzuliaren berri emango digu Arritxu Iribar lankideak, eta Eibarri buruzko bitxikeriak jakingo ditugu, etapa han bukatuko delako. Segidan, asteburuan 'Amarauna' saioan landuko dituzten gaiak aurreratuko dizkigu Gari Udabek. Ondoren, Urdaibai Bird Centerrera joko dugu Edorta Unamunorekin, eta zinema-aretoetan ikusgai izango diren lanen berri ere emango dugu.

07:00etatik 13:00etara izango da martxan 'Faktoria'.