Albisteak
Astelehenean
Lanbide Heziketaren erronkez, 'Faktoria'n
ERREDAKZIOA | G.U.
Julen Elgeta HETEL Heziketa Teknikoko elkarteko presidentea eta Mikel Sarriegi Adegiko hezkuntza arduraduna elkarrizketatuko ditugu asmo horrekin.
Lanbide Heziketatik aterako da Euskal Autonomia Erkidegoaren langabezia tasa gutxitu dezakeen enplegua. Hori da Lanbide Heziketan ari diren ikastetxeek eman berri duten mezua. Euskal Herriko industriak, langile difizita du hainbat arlotan, eta ikasketa egitasmoak lan arlora bideratzeak ezinbesteko garrantzia dauka enpresariek behin eta berriz azpimarratzen dutenez. Mezu horietatik abiatuta egingo du 'Faktoria'k gogoeta astelehen honetan, goizeko 09:30etik aurrera. Julen Elgeta HETEL Heziketa Teknikoko elkarteko presidentea eta Mikel Sarriegi Adegiko Hezkuntza arduraduna elkarrizketatuko ditugu asmo horrekin.
07:00etan hasiko da albistegia. 07:50 aldera, Maite Artolak hartuko du lekukoa, eta Maddalen Arzallusen sinadura izango da. 08:30ean, Laura Mintegi, Ramon Etxezarreta eta Jose Ramon Beloki arituko dira aktualitateari buruzko analisian. 09:30 aldera ariko gara Lanbide Heziketaz, eta, albistegia amaitzeko, Bernardo Atxaga entzungo dugu.
10:00etan, Manu Etxezortuk hartuko du magazinaren gidaritza, eta, hasteko, asteburuko kirol emaitza eta gertakizun guztiak aztertuko dituzte Andoni Urbistondok eta Beñat Zarrabeitiak kirol solasaldian. 10:30ean, Unai Gomezekin hitz egingo dugu, Espainiako Eztabaida Liga Nazionaleko hizlari onena izendatu duten EHUko Zientzia Politikoa eta Kudeaketa Publiko Graduko ikaslea.
11:00etako kirol aurrerapenaren ostean, Oiartzunen egingo duten Paperezko ametsak liburu trukeaz ariko gara, eta Ezkabako kartzelan presoei laguntzeko emakume sareaz hitz egingo digu Amaia Kowasch ikerlariak. 11:30ean, Bilboko Hezkuntza Ordezkaritzan, autismoaren alde gose greba hasiko duen emakumearen istorioa ezagutuko dugu, bertatik bertara.
12:00etan, Kutxa Ekogunea tartea zabalduko dugu etxeko animaliekin elkarbizitzaz hitz egiteko, eta, segidan, Larraitz Iparragirrerekin hitz egingo dugu. Txotxongilo egilea da Guatemalan. Saioa amaitzeko, Tania Arriagaren 'Harriadak' entzungo ditugu, eta lehiaketa izango dugu.
07:00etatik 13:00etara izango da martxan 'Faktoria'.
