Josu Erkoreka, 'Faktoria'n

Josu Erkoreka, Eusko Jaurlaritzako Gobernantza Publiko eta Autogobernuko sailburu eta bozeramailea, izango da asteazken honetan 'Faktoria'ko gonbidatu nagusia. ETAren desegitearen ondorengoez, Jaurlaritza eta Nafarroako Gobernuaren arteko elkarlanaz, aurrekontuez eta pentsioen etorkizunari buruz galdetuko dio, besteak beste, Iñigo Alustizak. 09:00etatik aurrera entzun ahal izango da elkarrizketa. Gainera, 2018ko Max sarietarako 7 izendapen jaso dituen Solitudes lana ezagutuko dugu, Garbiñe Insausti aktorearekin. Kulunka antzerki taldearekin osatu du lana eta Garbiñe bera hautagaia da, emakumezko protagonistaren sarirako.

07:00etan hasiko da albistegia, Igotz Alkortak gidatuta. 07:50 aldera, Iñigo Alustizak hartuko du lekukoa, eta Eli Larrinagaren iritzi-tartea entzungo dugu. 08:30ean, solasaldian izango dira Maite Ubiria, Javier Díaz Noci eta Amaia Espinosa. 09:30 aldera, berriz, ekonomia-tartea zabalduko dugu. Adrian Zelaia EKAI Centerreko arduradunak egingo dizkigu arloko albiste nagusien iruzkina. Koldo Almandoz zuzendariaren aktualitatearen irakurketa zinematografikoak itxiko du saioa.

10:00etan, Manu Etxezortuk hartuko du lekukoa, magazina abiatzeko. Hasteko, Joseba Kamio publizistarekin hitz egingo dugu. 10:30ean, Iruñeko Metrominuto egitasmoa ezagutuko dugu: oinezkoentzako ibilbideen gida da. Camino Jaso Iruñeko Udaleko Ingurumen eta Mugikortasun arduradunarekin hitz egingo dugu.

11:00etako kirol aurrerapenaren ostean, Garbiñe Insausti aktorea elkarrizketatuko dugu. Kulunka antzerki taldearen Solitudes lanarekin, 7 izendapen jaso dituzte 2018ko Max Sarietan: Garbiñe bera hautagaia da, emakumezko protagonistaren sarirako. 11:30ean, berriz, Esther Moyuaren liburu gomendioa entzungo dugu.

12:00etan, Jon Itzaina eta Edio Pessi Rosa musikarien proiektua ezagutuko dugu. Brasil eta Euskal Herria batzen dituen 'Xoriño ibilitaria'. Gitarra eta guzti etorriko dira!. 12:30ean, Imanol Ituiñoren magia tartea entzungo dugu.

07:00etatik 13:00etara izango da martxan 'Faktoria'.