Giza katearen biharamunean, Angel Oiarbide, 'Faktoria'n

Angel Oiarbide Gure Esku Dago dinamikako bozeramailea izango da asteleheneko 'Faktoria'ko gonbidatu nagusia. Donostia eta Gasteiz batuko dituen giza katearen biharamunean egingo du ekitaldiaren balorazioa, Maite Artolaren galderei erantzunez. 08:30erako dute jarrita hitzordua. Bestalde, giza katea zerutik nola ikusi duten kontatuko digu Arturo Fernandez helikoptero gidariak.

07:00etan hasiko da albistegia, Iñigo Alustizak gidatuta. 07:50 aldera, Maite Artolak hartuko du lekukoa, eta Maddalen Arzallusen sinadura izango dugu. 08:30ean, Laura Mintegi, Ramon Etxezarreta eta Jose Ramon Beloki arituko dira aktualitateari buruzko analisian, eta Angel Oiarbide elkarrizketatuko dugu giza kateari buruzko balorazioa egiteko. 09:30 aldera, festen atarian animalisten ekintzak hartzen ari diren indarraz ariko gara, eta Bernardo Atxagaren zeruko kronika izango dugu, albistegia amaitzeko.

10:00etan, Manu Etxezortuk hartuko du magazinaren gidaritza, eta, hasteko, Gure Esku Dagok deitutako giza katea zerutik nola ikusi duen kontatuko digu Arturo Fernandez helikoptero gidariak. Ondoren, asteburuko kirol emaitza eta gertakizun guztiak aztertuko dituzte Andoni Urbistondok eta Beñat Zarrabeitiak kirol solasaldian. 10:30ean, maskoten errautsentzako loreontziak asmatu dituzten Maite Lopez Amaia Gil Mondragon Unibertsitateko Leinn Graduko ikasleak etorriko dira.

11:00etako kirol aurrerapenaren ostean, itsasoaz ariko zaigu Xabier Aierdi aditua, eta, 11:30ean, gradu amaierako lana Nikaraguan egin duen Alaine Aranburu ezagutuko dugu, Mondragon Unibertsitateko Ikus-entzunezko Komunikazioa Graduko ikaslea.

12:00etan, Kutxa Ekogunea tartea zabalduko dugu baserriko animaliak eskura egiteari buruz, eta, segidan, Apetitu on sukaldaritza eta gozogintza blog eleanitzeko egilea den Amaia Castorene elkarrizketatuko dugu. Saioa amaitzeko, Tania Arriagaren 'Harriadak' entzungo ditugu, eta lehiaketa izango dugu.

07:00etatik 13:00etara izango da martxan 'Faktoria'.