Klima aldaketa, kalean bizitzea eta Skakeitan taldea, 'Faktoria'n

Klima aldaketa, kalean bizitzea eta Skakeitan taldea izango dira astelehen honetako 'Faktoria' saioaren ardatza. Durangoko Azokari tartea egingo diogu, eta, gainera, Onintze Salazar eta Nikolas Segurola izango ditugu gonbidatu, eta Hotzaldi proiektua ere ezagutuko dugu.

07:00etan hasiko da saioa eguneko albiste nagusien errepasoarekin. 08:00etan, Maite Artolak hartuko du 'Albiste Faktoria'ren gidaritza, eta Italiara begira jarriko gara Niko Cuenca ekonomistarekin eta Ane Irazabal berriemailearekin. 08:30ean, solasaldian izango dira Joxe Juan Gonzalez de Txabarri, Martin Garitano eta Javier Diaz Noci.

09:30ean, Hotzaldi proiektuaren berri emango digu Garazi Solis arduradunak eta Josean erabiltzaileak. Ordua amaitu aurretik, Bernardo Atxagaren gogoeta entzungo dugu.

10:00etan, 'Faktoria Magazina' jarriko du martxan Manu Etxezortuk. Hasteko, klima aldaketa izango dugu hizpide. 'Klima aldaketa geratzeko oraindik garaiz al gabiltza?' hitzaldia eman berri du Onintze Salazar fisikari eta meteorologoak, eta, astelehenean, gurean azalduko du zein den bere tesia. Maysha izango dugu ondoren, eta, kirol aurrerapenaren ostean, Martin Gartziandia Gasteizko sindikoa arituko zaigu, ARICHi, Gasteizko Alde Zaharra zaharberritzeko agentziari, buruz.

11:00etako ordua kirol solasaldiarekin hasiko da. Beñat Zarrabeitiak eta Andoni Urbistondok asteburuko kirol emaitzak eta gertakariak aztertuko dituzte. Jarraian, Nikolas Segurola: Fraide, artzain eta bertsolari liburua dela eta, gurean izango dugu Nikolas Segurola bera.

12:00etan, Boluntarioen Egunari ere egingo diogu tartetxoa, eta Durangora joko dugu gero. Azokan izango da Amaia Artetxe, eta Skakeitan taldeko kideak elkarrizketatzeko aukera izango du. Gainera, Wimy gailuaz hitz egingo diote Iaione Martinezek eta Maitena Urretabizkaiak. Saioa amaitu aurretik, Tania Arriagaren showa ere izango dugu.

07:00etatik 13:00etara, martxan izango dugu 'Faktoria'.