Faktoria
Astelehenean
'Errementari' filma ikusi nahi duzu? 'Faktoria'k gonbidatuko zaitu!
ERREDAKZIOA | G.U.
Aurrestreinaldia egingo dugu Bilbon, zuzendari eta aktoreekin. Gainera, Rural Zombies taldearen musika eta Imanol Ituiño magoa izango ditugu zuzenean. Streaming bidez emango dugu, eitb.eus-en.
Euskadi Irratiak Errementari filma ikustera gonbidatu nahi zaitu. Otsailaren 26an, 10:30ean, izango da zinema emanaldia, EiTBren Bilboko egoitzako Multibox aretoan. Aurrestreinaldiari lotuta, 'Faktoria' saioaren magazina egoitzaren sarreratik egingo dugu, 10:00etatik 13:00etara, eta, Manu Etxezorturekin eta horren lantaldearekin batera, bertan izango dira Paul Urkijo zuzendaria, eta Kandido Uranga, Eneko Sagardoy, Itziar Ituño, Joxean Bengoetxea, Uma Bracalia eta Aitor Urzelai aktore nagusiak. Gainera, Rural Zombies talde zestoarrak hainbat abesti joko ditu zuzenean, eta Imanol Ituiño magoaren trikimailuak ere izango ditugu.
11:30etik 13:00etara bitartean, saioa streaming bidez izango da ikusgai eitb.eus-en, Euskadi Irratia eta 'Faktoria' atarietan.
Errementari filma doan ikusi nahi baduzu, eskatu gonbidapena errementari@eitb.eus helbidean.
Paul Urkijo zuzendari gasteiztarraren lehen film luzeak Film Luze Onenaren Saria eta Ikusleen Saria eskuratu zituen Donostiako Fantasiazko eta Beldurrezko Zinemaren 29. Astean.
