Maria Jauregi, ostiraleko 'Faktoria'n

Goizeko 07:00etan ekingo da asteko azken ‘Faktoria’ Maite Artolaren eskutik. Tarana Karin kolaboratzaile bezala estreinatuko da ‘Sinadura’ atalean. Azerbaijandarra da bera, musulmana, feminista eta ekintzailea. Bere iritzi zutabea eskainiko du, ostiral honetatik hasita, hamabostean behin.

Zinemaldia ere ostiral honetan hasiko da, eta horretaz mintzatzeko aukera izango dugu Mertxe Etxeberria eta Begoña del Tesorekin.

Legebiltzarrean ostegun honetan izandako politika orokorrari buruzko bilkuraren analisia egingo dute Martxelo Otamendi eta Xabier Riezuk.

Gonbidatu nagusia, ordea, Maria Jauregi izango da eta 09:30ak aldera elkarrizketatuko du Maite Artolak. Juan Mari Jauregi ETAk hil zuen Gipuzkoako gobernadore zibili izan zenaren eta Maixabel Lasa Jaurlaritzaren Biktimen Arretarako bulegoko zuzendari ohiaren alaba da. Ez dio bere buruari biktimen kategoria aitortzen: “nire aita da biktima; ez ni”, zehazten du. Ez da publikoan agertu orain arte, baina orain  dela gutxi plazara atera nahi izan du elkarbizitzaren aldeko mezua indartzeko.

10:00etan ‘Faktoria Magazina’rekin etorriko da Manu Etxezortu. Idoia Torregarai izango da lehen kolaboratzailea eta gai dibertigarri batekin etorriko da: “ezin barreari eutsi”. Aljeriako gerrara egingo dugu jauzi ondoren, Juanjo San Miguelekin.

Donostiako Zinemaldia ere ez dugu ahaztu eta Mertxe Etxeberria eta Arkaitz Basterra arituko dira horretaz. Zinemalditik urrundu gabe, Joseba Lakak festibalaren eta teknologiaren inguruko sekretu guztiak kontatuko dizkigu.

Alzheimerraren eguna da, eta Cita-Alzheimer Fundazioko ikerlaria den Ane Iriondo neurobiologoarekin egingo dugu solas: gaitzaren fase goiztiarra ikertzeko 50 urtetik gorako boluntarioen bila dabiltza.

Filosofiaren historia gaurkotuaz gehiago ikasiko dugu Markos Zapiainekin. Asteburuan ‘Amarauna’ saioan jorratuko dutenaren aurrerapena egingo du Gari Udabek.

Saioa amaitzeko, asteburuko eguraldia, ‘Momentu itzela’, lehiaketa eta ‘bermutaz’ gozatzeko aukera izango dute entzuleek.

Ez ezazu galdu! Goizeko 07:00etatik 13:00era, ‘Faktoria’ Euskadi Irratian eta eitb.eus-en.