Lander Martinez, Elkarrekin Podemoseko idazkari nagusia, 'Faktoria'n

Eusko Ikaskuntzak asteazkenean jasoko ditu autogobernu berrirako lege testua jasotzeko enkarguaren xehetasunak. Legebiltzarreko lan-talde berezian emango diete informazioa eta bilera horretan parte hartuko duen Lander Martinez, Elkarrekin Podemoseko idazkari nagusia, 'Faktoria' albistegian izango dugu, aktualitate politikoa jorratzeko. Magazinean, bestalde, Gipuzkoako Argazkilari Elkartearen Donostiako egoitzara joango gara eta 'Zinesperientziak' erakusketaren egilearekin, Aritz Dendategi argazkilariarekin, hitz egingo dugu, Zinemaldiko izarren erretratuak egiten baitaramatza azkeneko hamazazpi urteak. Gainera, Lekeitioko Euskal Zine Bilera izango dugu hizpide, Aitor Gametxo jaialdiaren koordinatzailearekin.

07:00etan hasi da albistegia, Maite Artolak gidatuta. 08:00ak aurretik, Elixabete Garmendiaren 'Sinadura' entzungo dugu. 08:30ean,Patxi Berhoet kazetaria sartuko zaigu Paristik, Manuel Vallsez hitz egiteko. 08:45ean izango da solasaldia, eta Jasone Aretxabaleta, Hedoi Etxarte eta Iker Rioja ariko dira aktualitatearen analisia egiten. 09:00etan, Begoña Del Tesok Zinemaldiak eskainiko digunaz hitz egingo digu.

09:15 aldera elkarrizketatuko dugu Elkarrekin-Podemoseko idazkari nagusi Lander Martinez, eta, 09:45ean, ostiralean Gipuzkoako adinekoen egoitzan egitekoa den grebari buruzko argibideak emango dizkigu ELAko Idoia Elustondok.

10:00etako albisteen ostean ekingo dio Manu Etxezortuk magazinari. Hasteko, Andres Osa Sakona Euskadi Irratiaren herri kirol adituari elkarrizketa pertsonala egingo diogu, erretiroa hartzera doala eta. Jarraian joko dugu 'Zinesperientziak' erakusketa ikustera, eta, segidan, 'Ekosfera' tartea zabalduko dugu Jokin Aldazabal lankidearekin.

11:00etako albistegiaren ondoren,Zinemaldiaren leihoa zabalduko dugu, eta Vitoria 3 de marzo filmaren estreinaldiaz ariko gara, tartean, Lara Izagirre ekozlearekin. 11:30ean, berriz, dendetan arropa probatzeagatik kobratzen hasteko ideiaz ariko gara. Jarraian, 'Arts & Science' tartea zabalduko dugu Eneko Axpe, 'Maisha'rekin, eta, 12:00etan, Lekeitioko Euskal Zine Bileraren berri emango dugu. Ondoren, munduko musikak ekarriko dizkigu Agus Barandiaranek.

07:00etatik 13:00etara izango da martxan 'Faktoria'.