Cabacas kasua, 'Faktoria'n

Datorren astelehenean, urriak 15 dituela, hasiko da Bizkaiko Lurralde Auzitegian Iñigo Cabacasen hilketa argitzeko epaiketa. Sei ertzain eseriko dira akusatuen aulkian: ofizial bat, bi ofizialorde eta hiru ertzain. Zuhurtzia gabekeria larriko giza hilketa leporatzen diete 2012ko apirilaren 5ean Bilboko María Díaz de Haro kalean gomazko pilotak erabiltzeagatik. Iñigo Cabacasen heriotza eragin zuten pilotakadak izan ziren haiek. Haren guraso Fina eta Manu ondoan dituela elkartu da Maite Artola, Jone Goirizelaia abokatuarekin. Gertakari haren ondokoaz, epai bideaz, eta astelehenetik aurrera espero dutenaz arituko dira elkarrizketa luzean, ostegunean 'Faktoria'n.

09:30ean izango da hori. Aurrez, kazetarien tertulian arituko da Martxelo Otamendi, Nerea Azurmendi eta Joseba Arruti. Egunak dakartzanak aztertuko dituzte eta erreparatuko diete, bereziki, prentsa askatasunari eta informatzeko eskubideari, hainbat agintarik kazetarien galdera deserosoen aurrean izan dituzten jarrera zakarrak direla-eta. Eguneko sinadura Aingeru Epaltzak ekarriko du, goizeko 08:00etako albistegiaren aurretik.

10:00etako albisteen ostean ekingo dio Manu Etxezortuk magazinari. Hasteko, aktualitateari begira jarriko zaizkigu Mikel Garcia eta Jurdan Arretxe kolaboratzaileak. Gero, Euskaraldiko istorioei egingo diegu tartea Yogurinha Borovarekin eta, 11:00etako albistegiaren ostean, Txikiteroaren Egunean izango da Amaia Artetxe lankidea eta itsasoaz ariko zaigu Xabier Alberdi kolaboratzailea. Segidan, garun paralisia duten pertsonek sexualitatea nola bizi duten kontatuko digute Jose Luis Madrazok eta Joxe Mari Uriak.

12:00etan, sushiaz eta Gastronomika jaialdoiaz ariko zaigu Jurgi Arejita sukaldaria, eta, jarraian, Rubik kuboa azkar baino azkarrago egiten duten Julen Ximon Iriarte eta Eder Olivencia izango ditugu gurean eta euren trebezia zuzenean erakutsiko digute: oinekin eta begiak itxita burutuko dute Rubik kuboa! Saioa bukatzeko, Urdaibai Bird Centerrera joko dugu Edorta Unamunorekin, eta lehiaketa izango dugu.

07:00etatik 13:00etara izango da martxan 'Faktoria'.