Josu Erkoreka, 'Faktoria'n

Josu Erkoreka, Eusko Jaurlaritzako Gobernantza Publiko eta Autogobernu sailburua eta bozeramailea, izango da Euskadi Irratiko 'Faktoria' saioko gonbidatu nagusia asteazkenean. Aktualitate politikoaz galdetuko diogu, besteak beste Gernikako Estatutua betetzeko eskakizunei buruz, Espainiako Gobernuak horretarako duten prestutasunaz, eta baita Estatutuaren berritzeaz ere.

Gainerakoan, Ameriketako Estatu Batuetako hauteskundeen emaitzak aztertuko ditugu solasaldian, Joseba Zulaika Renoko Unibertsitateko Euskal Ikasketen Zentroko irakaslearekin.

Iruñerriko Euskalerria Irratiarekin ere egingo dugu konexioa, 30 urte betetzen dituztela-eta zorionak emateko. Eguneko sinadura Elixabete Garmendiak ekarriko du, 08:00etako albistegi nagusiaren aurretik.

10:00etako albisteen ostean ekingo dio Manu Etxezortuk magazinari. Hasteko, Xexili Foixek Marokon egindako emakumeen elkartasun rallyaz hitz egingo digu. Ondoren, Behobia-Donostia egingo duten hainbat korrikalarirekin hitz egingo dugu eta, 'Ekosfera' tartea zabalduko dugu gero Jokin Aldazabal lankidearekin, Mutrikuk pinuak ez fumigatzeko egindkao eskariaz.

11:0etako albisteen eta kirol tartearen ostean, 'Arts & Science' tartea zabalduko dugu Eneko Axpe, 'Maisha'rekin. 11:30ean, Gaby Etchebarne moja-ohi aldudarraren bizitzako esperientziak eta haren idazteko zaletasuna ezagutuko ditugu. Gaby Etchebarne oso gazte joan zen Aldudetik. Lehenik Parisera komentura, gero Argentinara, Laoseko oihanean ere bizi izan da. Berak jende xumea, behartsua eta apala mirestu izan du betidanik. Duela egun gutxi, 86 urterekin, bere zortzigarren liburua aurkeztu du “Hemen dira latinoak” (Les latinos sont là), zirkuko artista batzuekin egindako elkarrizketetako bizipenei buruzkoa.

12:00etan, Kukai dantza-konpainiako Jon Mayaren bisita izango dugu. Konpainia horren 'Erritu' ikuskizun berriari buruzko azalpenak emango dizkigu. Jarraian, munduko musikak ekarriko dizkigu Agus Barandiaranek.

07:00etatik 13:00etara izango da martxan 'Faktoria'.