Andu Lertxundi eta Jon Sarasua, doluaz, 'Faktoria'n

Andu Lertxundik urrian galdu zuen emaztea, Mari Carmen. Jon Sarasuak, Aitor anaia, berriz, azaroan. Dueloan egiten ari diren bideak batzen ditu biak, eta horretaz hizketa egiteko gonbidatu ditu 'Faktoria'k. 09:15etatik aurrera arituko dira, Maite Artolarekin, elkarrizketan.

Aurrez, aktualitateko gaien analisia egingo dute solasaldian, aste honetan, gainera, solaskide berri baten laguntzaz. Iñaki Goirizelaia Ingenieritza katedraduna eta EHUko errektore izandakoa arituko da Hedoi Etxarterekin batera.

Eguneko sinadura, Begoña Muruagak jarriko du goizeko zortzietako albistegiaren aurretik.

10:00etan ekingo dio magazinari Manu Etxezortuk. Hasteko, Idoia Torregaraik umorez landuko duen gaia: soberan ditugun gorputz zatiak (gizonezkoen titi-buruak, apendizea, belarriak mugitzeko giharreak…). Bestalde, Madrilgo basozain euskalduna ezagutuko dugu: Almudena Miragaya.

07:00etatik 13:00etara izango da martxan 'Faktoria'.