'Margolaria' filmaren estreinaurrekoari lotutako saio berezia, 'Faktoria'n

Mikel Urdangarin ardatz duen Margolaria filma karteldegira iritsiko den egunean, estreinaurrekoa egingo dugu EiTBren Bilboko egoitzan eta handik egingo dugu 'Faktoria' magazin osoa. Emanaldia Multibox aretoan egingo dugu, eta izena eman duten entzuleek izango dute ikusteko aukera. Oier Arantzabal (zuzendaria), Mikel Urdangarin (protagonista), Ritxi Lizartza (ekoizlea) eta Alain Urrutia (margolaria) izango ditugu bertan, eta, filma amaitutakoan, euren iritzia emango diete protagonistei. Gainera, Urdangarinek hainbat kantu joko ditu zuzenean. Filma amaitu osteko saio osoa (zuzeneko kantuak barne), streaming bidez ikusgai izango ditugu eitb.eus-en.

Bestalde, ostirala izanik, albistegian hurbileko elkarrizketaren tartea izango dugu. urtea bitan zatitzen dute artzainek eta egutegiak udaberrian gaudela badio ere, negua da Joseba Insausti artzainarentzat. Eta negua da, haientzat, lan kopuru handiena dakarren urtaroa. Tradizioak erakusten du, San Jose bueltan jaio izan direla arkumeak, larrea haztearekin batera, nahiz eta orain jaiotzak pare bat hilabete aurreratu diren. Ardiek erditu, kumeak zaindu, animaliak jetzi eta ardia moztu. Dozena bat ardi umea egiteko dituela harrapatu dugu Joseba Intxausti eta bere egunerokoaz ariko da Maite Artolarekin, gertuko elkarrizketen tartean.

07:00etatik 13:00etara izango da martxan 'Faktoria'.