Oriol Junquerasi elkarrizketa, astelehen honetan, 'Faktoria'n

Lledonersko espetxetik erantzun ditu Euskadi Irratiaren galderak Oriol Junqueras ERCko presidenteak. Bere alderdiak Pedro Sanchezen inbestidurari buruzko galdeketa egingo duen egunean Junquerasen ikuspuntua jasoko dugu Kataluniako prozesu independentistaz, Espainiako gobernagarritasunaz eta Euskal Herriko indar politikoekin eraman beharreko elkarlanaz.

Gainera, Emakumeenganako indarkeriaren kontrako nazioarteko egunean, indarkeria mota horren testuinguruan negozioa egiten ari ote den galdetuko du ‘Faktoria’k. Hainbat segurtasun enpresa eskaintzen hasi diren produktuak direla-eta aztertuko dute gaia, solasaldiaren garaian, Mila Amurrio soziologo adituaren laguntzarekin. Nuria Lopez de Guereñu, Ainhoa Etxaide eta Edurne Egino arituko dira tertulian astelehen honetan, gai horretaz bezala, aktualitateak ekartzen dituen gainontzekoei buruzko analisia egiteko. Besteak beste, Kataluniara begira jarriko gara, ERCk bere oinarriei Espainiako gobernagarritasuna eta elkarrizketa mahaiari buruz egin behar dien kontsulta dela-eta.

10:00etan ekingo dio magazinari Manu Etxezortuk. Hasteko, kirol solasaldia izango dugu Ane Urkirirekin eta Beñat Zarrabeitiarekin. Gainera, tratu txarrak pairatzen dituzten emakume eta haurrekin lan egiten duen Annick Troundayrekin hitz egingo dugu. Ixa telesail aplikazio berria aurkeztuko digu Egoitz Diaz Ibargoitiak, eta Gabiriako Nokaldia ere ezagutuko dugu.

 07:00etatik 13:00etara lanean ariko da 'Faktoria'.