Mikel Olaziregi, ostiralean, 'Faktoria'ko gertuko elkarrizketan

2001 eta 2010 urte artean Donostiako Zinemaldiko zuzendari izan zen Mikel Olaziregi. Erretiroa hartu berria, bizilekua Andaluziatik Euskal Herrira aldatuta, zinema mundua ez du erabat utzi nahi eta lantoki eta kasik bizitoki izan zuen zinemaldiarekin elkarlanean jarraitzeko helburu betez itzuli da etxera. Bere pasioaz, zineaz, Donostiako zine jaialdian bizi izandakoez eta etorkizunerako proiektuez ariko gara Mikel Olaziregirekin.

Laura Mintegi eta Xabier Barandiaranekin osatuko dugu aktualitate solasaldia, begi bat Zaldibarren jarrita eta ostiralero moduan, Pablo Joxe Aristorenak jarriko dio post-data, asteari.

10:00etan, magazinari ekingo dio Manu Etxezortuk. Hasteko, maitasun kantez ariko zaigu Idoia Torregarai, goizari umore printza ateratzeko. Segidan, Gurutze Gorriaren «Maitemindu » kanpainaren berri emango dugu: maitasun sareak indartzeko beharra aldarrikatzeko. Gainera, Amaia Albesek ezkontza soinekoez hitz egingo digu, eta itsas trikuak jateko ohitura zabaltzen ari ote den aztertuko dugu. Arrasateko enplegu azokan ere egongo gara.

07:00etatik 13:00etara izango da zabalik 'Faktoria'.