Xabier Egibar, Euskadiko Kutxako zuzendari nagusia, 'Faktoria'n

Euskadiko Kutxako zuzendari nagusi kargua hartu berritan eta urteko balantzea aurkeztu ondoren, lehen elkarrizketa eskainiko du Xabier Egibarrek. Euskadi Irratiko 'Faktoria'n, etorkizunerako erronkak eta aurrezki kutxen sektorearen egoera azalduko du.

Nerea Azurmendi, Nuria Lopez de Guereñu eta Ainhoa Etxaiderekin osatuko dugu aktualitateari eskainitako solasaldia eta apirilaren 5ko hauteskundeetarako hautagaiekin lotutakoez gain, azken asteetan puri-purian dagoen Europako PAC edo Nekazaritza Politika Bateraturako diru-laguntzez ariko gara. Bittor Oroz Nekazaritza sailburuordeak eztabaida honetan Eusko Jaurlaritzak jarri dituen lehentasunak argituko dizkigu.

10:00etan ekingo dio magazinari Manu Etxezortuk. Hasteko, Izaro Andres abeslaria elkarrizketatuko dugu. Bestalde, ahaztutako emakumeen historia azaleratu nahi duen Segurako “Hariz hari, sorgindu hadi” ibilbide turistiko-pedagogikoan barneratuko gara. Gainera, Joseba Argiñano sukaldari gozogilearen hozkailua miatuko dugu eta han aurkitutakoarekin osatu beharko dute menua Pili Manterola eta Igor Zalakain-ek. Azkenik, Tolosako inauterietara ere hurbilduko gara.

07:00etatik 13:00etara izango da zabalik 'Faktoria'.