Faktoria
Teknikariok sindikatua
"Bertso saioak edo kontzertuak ezin dira egin; terraza batean elkartu gaitezke?"
Emanaldi publikoetako teknikariek lehen sindikatua sortu dute: Teknikariok izena jarri diote. Datorren astean kultura sailarekin bilera egitekoa dute.
-
Teknikariok sindikatua. Gorka Agirre eta Andoni Mendizabal, zuzeneko emanaldietako teknikariak
21:17 min
Euskal Autonomia Erkidegoan 7000 pertsonek lan egiten dute zuzeneko emanaldien sektorean. Artistak dira horietako asko, beste asko, ikuskizunak egin ahal izateko 'atzeko -lanak' egiten dituzten teknikariak. Soinuan aritzen direnak, argiztapenekoak, muntaien arduradunak, ekitaldietan alfonbra gorria jartzen duena, etab. Zerrenda luzea da eta "kezkatuta eta urduri" aurre egiten diote COVIDak ekarri duen egoera berriari. Udaberritik udazkena bitarteko hilabeteetan pilatzen da euren lan-kargaren zati gehiena eta aurten ia guztiek egutegia hutsik dute. "Sektorea ez da 2022 arte errekuperatuko" esan du 'Faktoria' saioan, Gorka Agirre TEKNIKARIOK sindikatuko ordezkariak. Soinu teknikaria da Gorka Agirre, eta Andoni Mendizabalek argiztapenen ardura du ikuskizunean. Autonomoa da Andoni, soinu teknikarien %40 den moduan, eta diru-sarrerak erabat galduta dituenez, beste esparru batzuetan hasi da lanean. Gorka Agirre, aldiz, enpresa baterako lan egiten duenez, ERTE edo aldi baterako lan erregulazioan dago. Sektorea betidanik "modu prekarioan" antolatuta dagoela salatu dute eta euren "lana ikustarazteko eta baldintza hobeagoak lortzeko" sortu dute TEKNIKARIOK sindikatua.
Kultura sailarekin harremanetan dira eta datorren asterako bilera egitekoa dute. Eskarien zerrenda prest dute tartean, dirulaguntzak sartzeko baldintzak aldatzeko proposamena jarriko dute mahai gainean. Galdera asko ere badituzte: "ez dut ulertzen arratsaldean zergatik ezin den bertso saio bat, olerki emanaldi bat edo kontzertu bat ikusten egon; terrazan egon behar dut garagardoa edaten? Hori da al osasuna!?".
