Muguruzak Kuznetsovari irabazi dio eta bigarren kanporaketan egongo da

Munduko hirugarrena den Garbiñe Muguruzak irabazi egin dio astearte honetan Svetlana Kuznetsova (42) errusiarrari Roland Garros txapelketako lehen kanporaketan, eta, horrenbestez hurrengo fasean izango da. Bertan, 21 urteko Fiona Ferro frantziarra (257) izango du aurkari, aurreko fasetik datorrena.

Frantziako tenis txapelketa 2016an irabazi zuen Muguruzak 2009ko irabazlea azpiratu du (7-6 eta 6-2), bi ordu eta bost minuturen ostean.

Gaurko garaipenarekin Muguruzak munduko lehenengo postua lortzeko borrokan jarraitzen du. Hori erdiesteko, Roland Garros irabazi beharko luke, baldin eta finalean ez badu jokatzen Caroline Wozniacki daniarraren (2) aurka.