Alonso: '2011 urte zaila izan da'

Fernando Alonso Ferrariko pilotuak "maila pertsonalean eta profesionalean urte ona izatea" eskatu dio 2012ari. Gainera, etorkizunak zer ekarriko dion jakiteko gogoa duela esan du: "Hurrengo urtean zer gertatuko den jakiteko itxaropen eta jakin min handia dugu urteko une honetan".

Alonsok 2011 "urte zaila" izan dela aitortu du, bai berarentzat baita taldearentzat ere. Hala ere, itxaropentsu agertu da: "Ikasbide onenak arazoetatik eta lasterketa zailetatik ateratzen dira".

Emaitza txarrak lortu arren, Alonso lasai egon daiteke, Ferrariko presidenteak, Luca Cordero di Montezemolok, hiru gauza positibo aipatu baititu: "Alonsoren, Bat Formulako piloturik onenaren, denboraldi ona; taldeak egin dituen aurrerapen handiak, batez ere estrategian; baita Silverstonen lortutako garaipen berezia ere".