Espainiak urrezko domina irabazi dio Australiari Elliotten

Tamara Echegoyenek, Sofia Torok eta Angela Pumariegak urrezko domina irabazi dute belako Elliott 6 m modalitatean, Londresko Olinpiar Jokoetan. Espainiako taldeak Australiakoari irabazi dio, Olivia Price, Nina Curtis eta Lucinda Whitty kirolariek osatuta.

Finaleko lehenengo proba, oso berdinduta, Espainiak irabazi du. Bigarrena Australiarentzat izan da. Hirugarrenean, ordea, australiarrek akats bat egin dute, taldeko bat uretara joan da eta Espainia lehenengo postuan heldu da. Laugarren proban, Australiak berdinketa lortu du berriro, eta dominak bosgarren proban erabaki behar izan dira.

Echegoyenek, Torok eta Pumariegak bosgarren proba irabazi dute eta urrezko domina lortu dute. Espainiaren hamabosgarren domina da, urrezko hirugarrena.