Euskal Herriko Itzulia 2024
Lehen etapa
Etapa eta lidergoa, Luis Leon Sanchezentzat
Erredakzioa
Astana taldeko txirrindularia esprintean gailendu zaio Dani Navarrori. Jonathan Lastra (Caja Rural) eguneko ihesaldian izan da, eta mendiko sailkapeneko liderra da.
Luis Leon Sanchezek (Astana) irabazi du Euskal Herriko Itzuliko 56. edizioaren lehen etapa eta Espainiako txirrindularia da lasterketako lehen liderra. Itzuliari hasiera eman dion etapa Etxebarria eta Markina-Xemein artean egin da, eta 144 kilometroko ibilbidea izan du. Garaipena lortzeko faboritoek protagonismoa izan dute helmugatik hamar kilometrora egon den azken igoeran, baina ez da euren artean alderik egon.
Dani Navarrorekin (Cofidis) batera iritsi da ihes eginda Luis Leon Sanchez azken metroetara, tropelak ia harrapatu egin ditu, baina bien arteko esprintean erabaki da etapa. Sanchez nagusitu da azken metroetan. Navarro bigarren izan da, eta Simon Gerrans (Orica GreenEDGE) izan da hirugarren.
Jonathan Lastra (Caja Rural) euskal txirrindularia ere protagonista izan da lehen etapan. Eguneko ihesaldian sartu da, baina tropelak harrapatu egin du helmugara iritsi baino kilometro batzuk lehenago. Hala ere, Lastrak mendiko liderraren elastikoa jantzi du etapa amaieran.
Etaparen laburpena
Lehen etapan ihesladi luze bat ikusi ahal izan dugu. 17. kilometroan Gianluca Brambilla (Cannondale) eta Marcel Wyss (IAM) txirrindulariek ihesaldiari ekin diote. Ondoren, Jonathan Lastra (Caja Rural) eta Nicolas Edet (Cofidis) batu zaizkie.
Hasieran, Tinkoff jarri da tropelean lan egiten eta Orica taldea ere ibili da tropelaren buruan. 112. kilometroan Dario Cataldok (Astana) ihes eginda zihoazen txirrindulariak harrapatu egin ditu, eta bera ibili da lasterketaren buruan, bakarrean. Italiarraren saiakerak, ordea, ez du arrakastarik izan, eta tropelak harrapatu egin du helmugarako 10 kilometro falta izan direnean.
Azken kilometroetan Dani Navarrok (Cofidis) erasoa jo du, eta Luis Leon Sanchzezek berarekin bat egin du helmugarako 5 kilometro falta izan direnean. Bi txirrindulari hauek bat eginda iritsi dira azken metroetara eta esprintean Luis Leon atera da irabazle. Tropelak ez ditu harrapatu oso gutxigatik.
"600">
