Txirrindularitza
Txirrindularitza
Euskal Herriko Itzulia, zuzenean, egunero EiTBn
A.A,
EITB
Egunero ETB-1ek, Euskadi Irratiak, Radio Euskadik eta eitb.com-ek jardunaldiaren berri emango dute. Webgunean, gainera, lasterketari buruzko informazio zabala topa dezakegu.
EiTBko medioek jarraipen zabala egingo diote astelehenean hasi zen 53. Euskal Herriko Itzuliari. Etapa bakoitzeko azken kilometroen zuzeneko emankizuna egingo dute ETB-1ek, Euskadi Irratiak eta Radio Euskadik, albistegi zerbitzuetan lasterketaren informazio zabala eskaintzeaz gainera. eitb.com-en ere zuzenean jarraitu ahal izango da eguneko etapa, eta, gainera, probaren inguruko albiste eta irudi guztiak topatuko ditugu.
ETB-1 eta ETBK Sat
ETB-1ek arratsaldero egingo du bat lasterketarekin zuzen-zuzenean 14:45ean. Fermin Aramendi eta Xabier Usabiaga eguneko helmugan izango dira eta Alfonso Arroiok motorretik jarraitu du itzulia. Zuzeneko emankizuna ikusterik ez dutenentzat, ETBK Sat-ek berriro eskainiko du 20:30ean. Bestalde, eguerdiko 'Gaur Egun' eta 'Teleberri' albistegietan zuzeneko konexioak egingo dituzte lasterketaren inguruko azken berriak jasotzeko eta gaueko saioetan etaparen laburpena eta elkarrizketak eskainiko dituzte.
Euskadi Irratia
Euskadi Irratiak saio berezia egingo du egunero 16:00etatik 17:30era. Joxe Mari Apaolazak, Arritxu Iribarrek eta Kepa Iribarrek egingo dute lasterketaren kontaketa Txomin Perurena eta Patxi Vila adituen laguntzaz. Astelehenetik ostiralera konexioak egingo dituzte 'Faktoria'n 12:05ean, 'Goizak Gaur' albistegiaren hasieran eta 'Kirol Legez' saioan 14:10ak inguruan. Larunbatean 'Amarauna' eta 'Hiru Erregeen Mahaian' izango dira bategite horiek. Iluntzeko albistegian etapak eman duenaren azterketa egingo dute.
Radio Euskadi
Radio Euskadiko kirol taldeak ere adi-adi jarraituko du Euskal Herriko Itzulia. Arratsaldero saio berezia egingo dute lauretatik bost eta erdiak arte, zuzeneko konexioak orduz orduko albistegietan eta etapa hasieraren kontaketa 'Kilometro Cero' saioan. Motoa eta unitate ibiltaria izango dute lasterketa jarraitzen eta Joseba Beloki izango dute lagun komentarioetan.
eitb.com
eitb.com-en lasterketa zuzenean jarraitu ahal izango da. Gainera, txirrindularitzari eta Euskal Herriko Itzuliari propio eskainitako webgune berezia dute. Bertan, albisteak, argazkiak eta bideoak; lasterketaren historia; etapa bakoitzaren ibilbidea eta sailkapenak; txirrindulariei buruzko informazioa; inkestak... topa ditzakegu.
Txirrindularitza profesionalari buruzko munduko datu baserik onena ere eitb.com-en dago. Erabiltzaileek esku-eskura dituzte txirrindulari, talde, itzuli eta klasiken inguruko datu guztiak. Datu base hau Xabier Usabiaga txirrindulari ohi eta kazetariak kudeatzen du. Era erraz eta eraginkorrean berehala datuak eskaintzeko aukera ematen du.
