Zdenek Stybarrek ortzadarra jantzi du Hoogerheiden

Zdenek Stybarrek Munduko Ziklokros Txapelketan irabazi du beste behin, Hoogerheideko zirkuituan (Herbehereak). Txekiako txirrindulariak Sven Nysi irabazi dio azken itzulian. Biak batera ibili dira lasterketa osoan zehar. Nysek indartsuagoa zirudien, erritmo handiarekin, baina Stybar izan da azken kolpea eman duena, eta azken txapeldunari 12 segundu atera dizkio. Bien arteko borroka gogoratzeko modukoa izan da.

Kevin Pauwelsek irabazi du brontzezko domina. Hasieratik egon da atzean, Van der Haar, Niels Albert eta Francis Mourey bezala, aurreko bikotetik urrun. Lasterketa Stybar eta Nysen arteko duelu psikologikoa izan da. Txekiarra belgikarraren amesgaiztoa da. Txapelketan parte hartzea erabaki duenetik lau egun baino ez dira igaro, eta lasterketa gutxi egin ditu txekiarrak. Kannibaal belgikarrarentzat pentsaezina zen.

Sven Nys irabaztetik oso gertu egon da. Erritmo handiarekin eutsi du borroka. Bi itzuli falta zirenean, txekiarra atzean uztea lortu du, baina urduritasunak jota, akatsek berriro batu dituzte bi txirrindulariak. Bihurgune batean, Stybar erori egin da eta Nysek aurrea hartu dio. Aldea ez da nahikoa izan, Stybarren erasoak berriro aurrera eraman duelako. Erasoak eta kontraerasoak egon dira bien aldetik, azken itzulian Stybarrek azken kolpea eman duenean. Belgikarrak ezin izan dio Stybarri lokatzean erantzun, eta urrea Txekiako Errepublikara itzuli da. Stybarrek Nysen amesgaiztoa izaten jarraitzen du.

23 urtez azpikoen proban, Wout Van Aertek irabazi du, nagusitasunez. Jonathan Lastrak ezin izan du iazkoa errepikatu, eta 27.a izan da.

SAILKAPENA

1 Zdenek STYBAR (Txekiar Errepublika) 1:05:29
2 Sven NYS (Belgika) +00:12
3 Kevin PAUWELS (Belgika) +00:40
4 Klaas VANTORNOUT (Belgika) +00:59
5 Tom MEEUSEN (Belgika) +01:07
6 Lars VAN DER HAAR (Herbehereak) +01:22
7 Ron PEETERS (Belgika) +01:43
8 Francis MOUREY (Frantzia) +01:53
9 Radomir SIMUNEK (Txekiar Errepublika) +02:04
10 Wietse BOSMANS (Belgika) +02:11