Txirrindularitza
Suitzako Tourra
Suitzan ere Frantziako Tourra prestatuko dute
Mikel Dominguez
Faboritoen zerrenda luze bat Suitzako errepideetan 'laugarren handia' irabazteko lehian arituko da, Dauphineko lekukoa hartuta.
-
Suitzako Itzulia / EFE.
Irabazteko aukera duten txirrindulari asko egongo dira Bellinzonan, Suitzako Tourraren 78. edizioa lehiatzeko asmoz, laugarren itzuli handiena. 9 etapatan zehar, Dauphineri kendu nahi izango diote 22 taldeetako txirrindulariek. Bi erlojupeko egongo dira, beste bi etapak goian bukatuko dute, eta tranparen bat ere egongo da.
Zuzenean emango dute Suitzako Itzulia, 15:35tik aurrera, ekainaren 14tik 22ra, ETB1ek eta eitb.com-ek.
Bradley Wiggins (Sky) Frantziako Tourrean ez dela egongo jakinda helduko da Suitzara. Britainiarrak, Kalifornian irabazle, guztiz indarberrituta dagoela erakutsi nahiko du. Rui Costak (Lampre-Merida) titulua defendatuko du. Domenico Pozzovivo (Ag2r), Giroko bosgarrena; Cadel Evans (BMC), Italian arrosa galdu zuena; Roman Kreuziger (Tinkoff-Saxo), Contador gabe lider; Thibaut Pinot (FDJ), eta Bauke Mollema (Belkin) beste izen garrantzitsuak dira.
Peter Sagan (Cannondale), Fabian Cancellara, Andy eta Frank Schleck (Trek), Tony Martin (Omega Pharma-Quick step) edota Mark Cavendish (Omega Pharma-Quick Step) eta John Degenkolb (Giant-Shimano) esprinterrak ere egongo dira.
Ion Izagirre (Movistar) izango da tropeleko euskaldun bakarra, Aitor Gonzalezek (Euskaltel-Euskadi) 2005ean irabazitako lasterketan.
